韋斯咸響周日晚宣布炒領隊羅達魷魚，當中原因包括不能忍受球隊上周六作客輸畀洛達咸呢啲細球會，我求大俠就話佢哋呢一着根本係早有預謀，唔使扮有道理嘞！
試諗下，韋斯咸季前賣走晒啲主力，雖然今季降落甲組競逐，但隊波散到咁都幾難搞，你估羅達係神仙咩？至於羅達領軍能力如何，看官們都有眼睇，佢管唔掂啲球員都已經唔係新聞，你韋斯咸𠵱家至話為隊波好，所以決定換領隊？況且上周六對洛達咸都只係今季首場敗仗，之前兩仗表現都唔差，呢個理由牽強啲啩！
我求大俠就話韋斯咸根本就係等緊呢場敗仗出現，可以名正言順咁炒羅達魷魚，係早有預謀嘅！做得最錯嗰個根本就係班董事局，錯在當初起用完全無頂級賽事執教經驗嘅羅達，搞到隊波上季降班！
西班牙人對足球狂熱，前日雖有皇馬對馬略卡呢場西班牙超級盃首回合大戰，但噚日各大報章體育版頭條，係威龍嘅西班牙車手艾朗素奪世界一級方程式匈牙利站冠軍。梗係啦，二十二歲嘅艾朗素係史上最年輕冠軍車手，重快車神舒密加個多圈過終點，真係前途無限！
以為西班牙「人球」文迪達可以為米杜士堡帶嚟生機，點知前晚咁大劑，佢喺場邊睇住隊波俾客軍阿仙奴數四粒，搞到好似搭咗賊船咁。大概米杜士堡知道唔多掂，已經搵到列斯後衞米斯加盟，希望聽朝凌晨作客李斯特城時，佢哋兩個爭氣啲，至少幫隊波攞番聯賽第一分啦！
孫繼海喺英格蘭似乎愈撈愈掂，上周六曼城對樸茨茅夫完場後，老孫突然被樸隊領隊哈利列納上前握手打招呼，閒聊兩句之後哈利列納就同「老孫」講想要佢件波衫，話係幫朋友攞喎！對方嘅領隊因為自己踢得好而想要自己件波衫，呢啲「畸士」都好少見，我覺得真係威喎！
熱刺準備同目前仍然養傷，短期內都未可以復出嘅德國後衞薛基，續多兩年新約。可能有人會覺得熱刺嘥錢嘥氣，事關薛基痊愈之後，都唔知可以回復昔日幾多成水準！不過我求大俠就認為呢個球圈，都唔一定樣樣計到盡咁現實嘅，起碼熱刺呢次就真係幾有人情味吖！