中石化（386）盈利只及預期下限，加上派息比率僅25%，觸發基金拋售，股價一度大跌逾9%，低見2.25元。高層午後向證券分析員解畫，盈利略遜預期，只因為期內有一筆12億元人民幣花紅支出。另外，有分析員唱好中石化，話中石化派息留前鬥後，全年派息比率將高達40%，所以大家毋須太憂心。如果芬佬聽話，中石化後市可能會反彈，但最怕係對沖基金繼續拋售，令中石化難以反彈。
國企股全線下挫，國企指數噚日受中石化拖累下挫4.72%，收報3158.54。黑客話，中國人民銀行突然調高存款準備金比率至7%，凍結1500億元人民幣，收緊銀根，國內銀行跟隨收緊信貸，金融市場當然會首當其衝，對國企股構成沉重打擊，睇嚟短期重有餘震。
新怡環球（1094）大股東繼續在市場沽貨，上周四再減持4120萬股，每股平均價0.44元，由於大股東持股量降至少於50%，搞到洽購控股權之商討亦告吹，消息曝光即令股價急挫17.65%，收報0.35元，成交高達2841萬元。大家唔好忘記，大股東肯以每股0.17元賣盤，現時只持有40.49%股權，1日沽10%，唔使5日就可以沽清。
里昂建議買入地產股，近期經常有傳聞話大陸客用現金掃樓，似乎樓市真係畀自由行帶旺，嘉里建設（683）噚日大升11.76%，收10.45元，升破早前私有化出價9.50元，證明小股東上次否決私有化，係十分正確的決定。
阿虎