最近睇公屋租金官司，睇到有啲眼花，因為報紙成日寫「租金佔入息中位數百分之十」，又睇到：「第二季租金佔入息比例中位數超過10%作起點。」呢句究竟點解？有議員對記者話：「入息八千，交租八百就差唔多嘞！」咦，八千元入息，等唔等於入息中位數呀？
既然唔多明白，就要睇書查資料。首先要知道乜嘢叫做中位數。中位數係統計學概念，英文叫median，譬如五個公屋戶嘅每月入息（income）分別係（一）九千（二）八千（三）七千（四）六千（五）五千，中位數就係第三嗰位，即係七千蚊，如果第三位公屋戶交租七百，租金佔中位數入息（medianincome）就係10%。上述五個住戶嘅平均入息（averageincome）啱啱亦係七千，但數字排列中位數通常會低於平均數。
好嘞，城市大學公共及社會行政學系副教授劉國裕喺《明報》寫過一篇關於公屋租管嘅文章。佢話：「租金支出（包括差餉及管理費）佔家庭入息的百分比稱為『租金與入息比例』。把租金與入息比例數據由小至大或由大至小順序排列，中間的數值便是『租金與入息比例中位數』。呢個數嘅英文名稱係MedianRent-to-IncomeRatio，即是RenttoIncomeRatio嘅中位數，簡稱MRIR，不等於入息中位數，更加唔係「月入八千，租金八百」咁簡單。