屬福士旗艦車系嘅Phaeton，雖有不同引擎配搭，但只有一款普通尺碼版本供用家選擇；而廠方有見及此，將會響嚟緊九月初舉行嘅法蘭克福車展上，展出全新長陣版，以吸引用家注意。
從相片中可以睇到，全新長陣版福士Phaeton，外表與普通版相近，同樣來得極富豪邁感；但軸距卻增多120mm，從而令後排乘客可擁有更充裕嘅乘坐空間，就算長途行車都唔會容易感到疲倦啦！設備配搭亦見齊全，除備有承托力極高嘅真皮座椅外，另外重有齊天窗、後排獨立冷氣、電動尾窗簾等等，享受程度可謂更上一層樓。引擎配搭則備有一台全新V8及W12引擎，馬力輸出各有不同，以切合不同用家需要呢！
