飲食人誌：
歎足9款餐酒餸菜都好味啲

紅酒、白酒、酒杯、甚至酒櫃，Stephen嘅公司都有代理，更常要到世界各地試酒，最開心嘅時候就係一班老友坐埋一齊摸住酒杯底傾吓偈。Stephen自從十幾年前轉做紅酒生意之後，每日嘅生活都離不開飲酒，真係飲酒多過飲水，最近重每日同佢嘅大廚朋友兼拍檔試酒試菜，配搭出9道菜式加9款紅、白酒嘅私房酒宴，定要證明佢嘅一套飲食理論：「菜式與餐酒配搭得好，餸菜會好食啲，酒又會好飲啲，味道完全唔一樣。」

記者：馬慶武攝影：周旭文

酒宴時嘅Stephen滿場飛，碰吓杯你一句我一句傾吓酒經，最後同食客兼朋友們個個飲到面紅紅，完全明白到Stephen話以酒會友嘅意思。「我呢個私房酒宴唔同一般嘅私房菜，最特別梗係可以飲到不同牌子嘅紅、白酒。飲啲酒，HighHigh哋個人就放啲，傾偈食飯都開心啲啦。而且一般私房菜邊有咁靚嘅酒飲。」

柏林圍牆令Stephen轉行
Stephen雖然一向都鍾意飲酒，但本來卻係從事製衣業，只係閒時會嗒番杯。直至89年，柏林圍牆拆卸，東、西德合併，令Stephen以東德為主要出口地嘅製衣生意愈來愈淡薄，咁啱當時認識咗美國紅酒廠Merryvale嘅酒商，原來Merryvale打算出售部份股份，「對一個鍾意飲酒嘅人嚟講，有機會以興趣為職業，梗係吸引啦。」就係咁，Stephen就代理咗呢隻酒嚟香港，正式開始佢嘅紅、白酒生意。

以酒配不同菜式
一般嘅試酒飯局，都會以菜式嚟遷就酒嘅味道，不過因為Stephen呢個寫字樓共有超過80種紅、白酒，所以就可以以不同酒嚟遷就不同菜式。只要大廚譚師傅製作出佢覺得最好嘅菜式，Stephen就會不斷嘗試配襯不同紅、白酒，再同譚師傅研究調味方面嘅問題。「最重要係餸菜唔可以蓋過酒嘅味道，而且香味要配合，濃味嘅菜配FullBody嘅酒，清淡菜式就配較Fruity嘅酒。」Stephen話每次都要經過反覆嘅嘗試，先可以配搭出最匹配嘅酒、菜。

酒菜好匹配
玉液藏龍配TAPESTRYChardonnay2001白酒
「玉液」即係用鯽魚連魚骨熬成鮮甜魚湯，而「藏龍」則係放在熬製完成嘅鯽魚湯中生浸嘅桂花魚，由於桂花魚係生浸熟，肉質保持嫩滑，唔會因熬得過久而變韌。而濃濃嘅魚湯配上木桶味較濃厚嘅白酒，更能突顯魚湯嘅鮮甜味。

清酒太白蜆配
DONNELLYRIVERSauvignonBlanc2001白酒
用日本清酒煮大蜆，蜆肉鮮甜有淡淡清酒香味，想酒味濃一點，可以喺食之前再用噴壺噴上清酒，咁就最香最好味。而配上嘅白酒則以充滿清香果味見稱，同清酒太白蜆相輔相成。

香檳芥末蝦球配
MERRYVALEStarmontChardonnay2000白酒
蝦球加上Wasabi調味，少少辣夠晒刺激，而據講MERRYVALE呢隻白酒連白宮宴會廳都用嚟宴客，味道則和香檳芥末蝦球一樣，清新得嚟帶點點刺激嘅果酸味。

金陵蟹粉水晶配
PARINGAESTATEEstateChardonnay2000白酒
粉皮爽口，而且充滿葱香及蟹粉香味，味道較香濃，配上呢隻感覺FullBody嘅白酒就最啱。

乳香金針炒雜菇配
PARINGAESTATEPeninsulaPinotNoir2000紅酒
用紅酒配菇類嘅原因係呢味炒雜菇用上南乳調味，所以味道較濃，所以同呢款重果香嘅紅酒非常合襯。

潮汕家鄉雞配
PARINGAESTATEEstateShiraz2000紅酒
雖然係白肉，但用上類似鹽焗雞調味方法嘅潮汕家鄉雞味道較濃較惹味，所以為佢配上充滿胡椒、香料味嘅紅酒。

沈老太肉餅配
MERRYVALEProfile1999紅酒
酒宴中有呢味肉餅，全因Stephen一個情意結，沈老太（Stephen媽媽）生前時常整呢味肉餅畀Stephen食，所以𠵱家Stephen每次食到呢味口感極佳嘅肉餅時，都會勾起童年不少回憶。而MERRYVALEProfile1999呢隻紅酒每支$1,320，係全個酒宴價值最貴嘅，FullBody得嚟非常幼細，餘韻好長，絕對值得飲多兩杯。

鬼酒燒鱔柳配
PERRYCREEKCellarSelectZinfandel1999紅酒
鬼酒係日本清酒嘅一種，有少許鬼酒味嘅炸鱔柳蘸上特製嘅甜醬更加好食，亦同果醬味豐富嘅紅酒更為配合。

食客兩句

胡鬚伯伯
價錢：$250/位（9道菜加一款甜品，不包括紅酒)$380-$680/位(9道菜加一款甜品及9款紅、白酒任飲，價錢視乎紅白酒價錢而定，每個酒宴都有兩至三個不同價錢嘅配搭，客人可預先選定。）6位起。
地址：柴灣永泰道70號柴灣工業城第2座1801室
訂座電話：28989787
酒菜開始時間：7:30pm
餐廳營業時間：6:00pm-12:00mn