朱玲玲同霍震霆喺三年前曾經一度傳出婚變，當時朱玲玲搬離位於沙宣道嘅霍家大宅StoneManor，同細仔啟仁住喺半山嘅甘苑，後來有傳佢老爺霍英東親自出面做和事老，朱玲玲至肯搬返屋企，但估唔到近排又傳霍震霆同朱玲玲嘅感情再亮紅燈，朱玲玲同父母及啟仁，重搬咗去壽山村道嘅恒安閣複式單位一齊住㖭。
霍震霆同朱玲玲結咗婚二十五年，如果佢哋婚姻有危機嘅話，相信大家都會好努力箍煲，噚日霍震霆坐開嘅平治房車，下晝兩點幾就曾經喺恒安閣出現，不過架車入去唔夠十分鐘，大仔霍啟剛就揸住架MiniCopper離開，而霍震霆架平治大概喺恒安閣逗留咗四十分鐘，臨走時，車入面啲人見有記者影相，就即刻搵報紙遮面。
朱玲玲同葉蒨文一向老友，噚日葉蒨文架七人車亦出現喺朱玲玲屋企樓下，唔知朱玲玲係咪見完老公之後，要同閨中密友傾吓心事呢？
黃伊汶噚日去咗新城電台接受訪問，佢話自己因為重感冒要食藥，可能藥力太勁嘅關係，搞到佢個人唔多精神，黃伊汶重話：「噚日我點香薰，唔小心燒着咗部MD機，同埋啲電線，好彩即刻知道，於是即係用張被冚熄啲火，好彩冇乜事啫。」
關德輝自從拍完《金牌冰人》之後，即刻成為大忙人，除咗傾緊兩部電影之外，重返咗老家馬來西亞，以六位數字擔任一個小麥草產品代言人，關德輝得到廣告商嘅垂青，係因為佢嘅形象健康，而且又不煙不酒。一向孝順嘅關德輝亦趁今次機會，返咗屋企探望媽咪。
組合DoubleR噚日出席喺會展舉行嘅活動時，成員梁奕倫話噚日朝早有廉政公署嘅人㩒佢個門鐘，佢個腦即時諗究竟最近同過邊啲人去卡拉OK，但原來廉署人員係嚟調查佢住嘅大廈，早前外牆維修時有人涉嫌行賄，嚟問吓資料，梁奕倫話：「佢重叫我去中環落口供，咁我梗係唔去啦，費事俾人誤會，最後佢話同我電話調查。」
台灣成立咗一隊「凱旋職棒明星隊」，搵咗安雅做代言人。日前安雅出席職棒發起嘅挑戰賽總決賽時，以啦啦隊嘅性感露腰短裙扮相出現之餘，重逐一親吻球員臉頰當做打氣，安雅話佢本身唔係棒球迷，但佢都攞晒棒球搵啲球員簽名。另外，安雅透露近來忙於拍攝寫真集，成日要飛嚟飛去，所以好忙喎。
