大市噚日雖然最終唔使跌，但好多國企同埋大價工業股就跌鋪勁，只有個別炒股繼續炒作。小初睇見其實有多少心驚，但喺呢個咁瘋狂嘅時間，往往係贏大錢最好時機，冇法子唔賭一賭。
小初正在左度右度之際，經紀黃有電話到，話噚日停牌嘅建滔化工（148），據講將收購另一間上市公司控股權。小初起初以為係依利安達（033）或者至卓國際（2323），因為建滔揸咗兩間公司唔少股份，但經紀黃話兩隻都唔係，而係秀華國際（567）至真。
小初聽完真係嚇咗一跳，因為秀華係小初青少年時代炒過嘅股份，已經沉睡多年，究竟有乜嘢咁巴閉，可以獲得建滔垂青？經紀黃話，唔太清楚，但佢覺得建滔股價去到家陣接近7元水平，再升水位有限，如果多個仔女，或者可以母憑子貴，炒一鋪勁都未定。
小初向來都覺得建滔搞財技，可能比搞廠更有一手，唔知復牌之後，兩股啲股價會係乜嘢光景。
慕容小初