最近業界對「自由行」會帶旺樓市嘅說法意見紛紜，但的而且確有部份內地人係因為咁，先至會嚟香港買樓。美聯鍾漢輝同蘭西講，佢啱啱就幫一名喺廣州開製衣廠嘅內地客，買咗個小西灣藍灣半島過千方呎單位。
個客因為生意關係，啲成衣要經香港轉口去美加，所以一直以來都以商務簽證嚟香港，但手續始終比較麻煩。𠵱家有咗「自由行」，於是把心一橫，喺香港買番層樓，好過住酒店。
呢位人兄多數喺港島區辦事，之前都睇過西半山寶翠園，同西灣河逸濤灣，但覺得個海景視野，唔及藍灣半島咁遼闊及平靜，加上又有親戚住喺嗰度，故順理成章咁買入藍灣半島。個單位係九座高層B室，面積一千二百方呎，成交價四百零六萬八千蚊，呎價三千三百九十蚊。重以一筆過畀晒，唔使向銀行借錢。
好多私樓同居屋公契都寫明唔畀養寵物，但係都重有好多冇公德心嘅住戶照養，重賴理其他住戶投訴，任由小動物作惡。
私樓同居屋唔同公屋，唔可以用扣分制去懲罰不守規距嘅住戶，但係，管理處就有權出律師信警告。好似早排黃大仙居屋天馬苑有名住戶，一手住落向來相安無事，但近幾年養咗隻狗，問題就愈鬧愈大。事關天馬苑唔畀住戶養大型寵物，管理處出過口頭警告不果，卒之要出律師信，講到明人狗不能共存。該名業主為咗愛犬，只好賣樓告別一住十幾年嘅老家，搬去西貢住村屋。由鬧市遷入僻遠小村，為隻狗真係犧牲大。
對於大部份仍然顧忌樓價再跌嘅香港人嚟講，呢排睇住內地豪客現兜兜買樓，會唔會心中不是味兒呢？不過，香港地重有好多有錢人，一百幾十萬現金買樓不過係等閒事。美聯營業經理曾令村報料，啱啱太古城就有一位本地豪客，動用一百八十萬現金，買咗恒山閣中層D室，六百九十一呎，呎價二千六百幾，屬市價。
名買家話，最近中了彩票，但冇明言係乜嘢獎金，手頭上有一大筆現金，噚日打正三號風球，睇咗五至六個單位後，就決定入市，打算自用。蘭西估計，能夠有咁大筆錢嘅彩票，中六合彩嘅機會較大。
全新住宅樓盤長沙灣宇晴軒嘅宣傳攻勢，已經逐步出台，早兩日發展商之一嘅長實，就聯同香港置業，搞咗個全方位答問大會，畀各區主管同經紀，向發展商提問樓盤嘅資料。負責今次答問大會嘅香港置業營業董事姚偉南話，希望藉着今次活動，深化外區同事對宇晴軒嘅了解。而長實就派出高級營業經理郭子威（圖三前右三），同埋助理營業經理曹皎明（圖三中）出席，喺賣樓前搞搞新意思，軟銷一番。
自由行話題熱到爆燈，本地媒體日講夜講，連外電傳媒都玩埋一份。中原地產話，呢幾日多間國際傳媒輪流訪問公司高層，都係圍繞講內地人士來港置業嘅話題，當中包括新華社、金融時報亞洲版、鳳凰衛視、新加坡電視台同埋英文中國日報等等，其中英文中國日報重專訪董事總經理黃偉雄，話題由經濟到地產市場。
蘭西
電郵地址：