恒指上周全周急升336點，收10760，距萬一不遠，遲早破萬一。不過，短線嚟睇，9RSI上到80，恐怕會因超買而窒步，暫時咪貪勝不知輸，最好等調整一吓先至買Call輪，可以買恒指Call輪，亦可以買藍籌Call輪。雖然話大市超買，亦唔適宜買Put輪，驚住超買之後再超買。
滙豐（005）除息後企喺100元樓上，過去3日企定定，落後於其他藍籌。等多一陣，等滙豐回落些少，或者其他藍籌再去而滙豐唔去之時，趁低買啲Call輪，對象係9845。呢件今年12月到期，現價69仙，溢價1.4%，槓桿率14.6倍，數據相當靚。滙豐好多另類Call輪，代號前便有個X，溢價計法唔簡單，唔識計者，最好咪搞，不如直接揀啲冇X個批。
中銀（2388）愈升愈有，上到9.45元，9RSI高到84.8，咁嘅位，追落去都恐怕水位有限，有可能即時吃眼前虧。畀啲耐性，等平一啲，收隻Call輪9794，10月到期，現價1.17元，溢價1.1%，槓桿率8.1倍。中銀未派中期息，計埋中期息因素，隻輪溢價高過表面數字，可能上到3%，並唔算特別便宜。
恒生（011）除息，收86元。除息股通常整固一吓，等幾日，如果平平哋，執少少Call輪等下一回合升浪，對象係9911，明年4月到期，輪價4.7%，槓桿率26.9倍，呢件，爆炸力好勁。
章盛