近年Nokia啲機唔係直身機就係橫身機，睇到都有啲悶，羅新基都有同感，不過早兩日互聯網上就流傳咗幾張Nokia概念機相，總算冇令到羅新基失望。首先以鬧鐘型設計手機，淨係顏色已經夠晒搶眼，加埋個旋轉式Keypad，認真夠「潮」。而另一部手表型手機，睇個款同隻普通手表咁下上大細，而且個樣成隻Swatch咁，加埋個鬧鐘型手機就絕對係Nokia「潮」氣Twins。
文：羅新基
原廠手機套向來都唔平，閒閒哋都要幾廿蚊一個，有時甚至成舊水先有交易。不過早輪手機場就有一批Nokia原裝行貨嘅手機袋出現，用尼龍料製造，的的骰骰細細個，有藍、白兩色，不過藍色去貨去得好快，唔係時時都有貨。而呢款機套就啱晒所有Nokia嘅6系、7系同8系機種使用，開價$58，入便重有個小型爬山扣，扣起背囊度都幾型，不過畀人偷咗部機就唔好搵羅新基喇。
查詢：27717141（萬方）
三星部S500水貨都番咗一段日子，不過一如以往慣例，水貨三星機係冇中文嘅，因此亦都令到唔少用家卻步。不過上星期終於都有S500嘅中文版出場，啱晒香港用家，睇SMS更加有親切感。而功能方面就同原本冇分別，256色外芒搭65,000色內彩芒、GPRS、WAP、40和弦一樣有齊，價錢就係$2,180，都算做抵玩。
查詢：23987320（鉑匯科技）
