出爐港姐冠軍曹敏莉的父親，前晚在港姐決賽上當眾撕毀女兒返回美國的機票，以示對愛女的支持。不過昨日曹敏莉自爆父親所撕只是假機票，不禁令人懷疑無綫刻意為曹敏莉造勢。而司儀曾志偉前晚狠批今年佳麗質素普通，沒有獨特性格，令他提不起興趣跟她們溝通。
本年度的香港小姐前晚順利誕生，出爐港姐冠軍曹敏莉、亞軍楊洛婷、季軍戚黛黛及其他獎項得主李詩韻和李嘉怡，昨日在尖沙嘴香格里拉酒店跟記者見面。曹敏莉表示當選心情興奮，回家後仍要翻看自己在比賽中的表現，至凌晨四時始上床睡覺。
前晚曹敏莉在港姐決賽中晉身五強時，其父在台上撕掉女兒返回美國的機票，以示對女兒的信心，但昨日曹敏莉卻踢爆前晚撕毀的是假機票，她說：「張機票係假嘅，爸爸上台做咗場戲娛樂大家。不過，屋企人就真係有買來回機票畀我，話如果我落選就返美國繼續讀書，𠵱家當選，就會留喺香港。」
曹敏莉這番話令人聯想到假機票是無綫安排，難免惹來造馬之嫌，惟無綫綜藝及體育科經理黃家亮昨在電話中否認說：「我哋只係叫佳麗同佢哋屋企人各自度一part上台表演嘅嘢，用啲乜道具都係佢哋自己預備，我哋根本唔知嗰張機票係假。而且，我哋亦唔知十二位候選者當中，有邊五個打入最後五強，點可能話係造馬？」
亞軍楊洛婷前晚打長途電話向爸爸報喜，還收到不少好友的祝賀，而季軍戚黛黛亦有意在娛樂圈發展，她說：「進修係活到老學到老，但眼前嘅機會就唔係成日有。」
此外，一向喜歡在港姐慶功宴上糟質佳麗的曾志偉，前晚只與舞蹈藝員拍照和耍樂。
志偉之所以手下留情，是因為對應屆港姐完全提不起興趣，他說：「今年冇feel，冇乜心水，佢哋好普通，冇乜獨特性格，往時我都會同啲朋友開盤玩吓，二十蚊、四十蚊咁貼吓三甲，但今年完全冇興趣玩。」
志偉不但止狂踩今屆佳麗，更指王從希落敗不是因為身材太矚目，他說：「年年身材勁嗰啲都會受注目㗎啦，佢（王從希）輸嘅唔係呢樣嘢，可能係應對，又或者係個樣有啲不足啫。」
陳百祥（阿叻）前晚在港姐決賽穿上泳褲做司儀，阿叻認為穿泳裝出場並無不妥，與佳麗肉帛相見更會真情流露。
問阿叻有關梅艷芳的病情時，他說：「我上星期見過佢，佢冇事，生老病死係人生必然嘅事，最緊要樂觀。」
而身為港姐表演嘉賓的謝霆鋒、陳奕迅和陳小春，前晚也有出席慶功。同為張栢芝緋聞男友的小春和霆鋒，不但坐在一起痛飲，還頻頻咬耳仔，狀甚老友。
採訪：卓寶花、楊潔雯
攝影：陳志嵐、仇志德、卓寶花
