近日熱門話題，非快閃黨莫屬。
但上周的快閃行動，卻淪為鬧劇，快閃至今尚未成風，也難怪，典型香港人心態──想試又不敢試，誰也不想成為笑柄，暫時還是隔岸觀火，睇定先跟風。
Sky五個大男孩，連同三位模特兒，當先鋒試玩快閃，玩後感是：「過癮，但無聊！」
記者：陳漢榮 攝影：伍慶泉
模特兒：Crystal、Julian、Holly
下午五時，Sky與三位模特兒在旺角百老匯戲院側的KFC開會，討論是次快閃行動的時間、地點與項目。五男三女，七嘴八舌，談不出個所以來，Bonald先歎氣：「咁無聊，我驚俾人當儍仔笑喎。」健仔皺眉頭：「玩得快閃，預咗無聊，唔無聊唔好玩㗎！」Bon認同：「都唔知點解啲鬼佬咁鍾意玩！」Gilbert與Yani則自嘲：「咁我哋𠵱家又玩？不如唔好玩囉。」未有結論先氣餒。
「橫掂出到嚟，玩埋先閃，話唔定好過癮呢。」Crystal欲試，但要跟大隊，Julian愛跟風：「無聊就係無聊啲，但鬼佬玩得起，我哋無理由玩唔起啫。」Holly全場出聲最少，但不鳴則已，一鳴有結論：「無聊又要玩，就咁玩啦，喺百老匯門口除鞋大嗌『快閃黨，好無聊！』，嗌夠3分鐘即閃。」
還是男孩子比較大膽，Sky蹲身，脫鞋；有先鋒壯膽，三模特兒有樣學樣，但脫不到一半，停，Holly撒嬌：「落雨喎，地下濕𣲷𣲷，點除鞋呀！」Bonald多計：「唔驚，我買報紙鋪地下，照玩。」Bon壯聲威：「我哋除一隻鞋，單腳企，照嗌口號，咪縮沙呀。」
「快閃黨，無聊！快閃黨，無聊！快閃黨，無聊……」眾人又跳又叫，引來大批旁人圍觀。實在太無聊，三模特兒感尷尬，先停，Sky勉強撐多一陣子，亦感面紅，健仔與Gilbert說：「不如閃咯。」Yani還想撐：「好頭好尾，拍完手掌，先閃……」掌聲過後，第一時間閃回KFC。
是次快閃不算成功，原定喊足3分鐘口號，現在喊不夠1分鐘，Sky總結：「過癮但無聊，不過算係咁啦，起碼拍埋手掌至走，我哋閃得咁快，都算得上快閃黨啩？」
8月22日，香港第二個快閃行動告吹。原定計劃在下午6時30分，到旺角好景商場門口喊「喂！4樓有四仔大叔！」喊完拍手掌即閃，但直至7時，依然無人參與，問長駐商場門口的「四仔大叔」有否快閃黨出現，他晦氣地答：「唔知呀！乜嘢快閃黨呀？乜嘢嗌三四分鐘口號呀……三仔四仔就有得賣，唔好阻頭阻勢。」想留意以後的快閃行動，可瀏覽
快閃行動，無聊行先，訪問以下群星，結論是無一人會參加快閃行動，但說到無厘頭鬼主意，他們卻意見多多。
建議行動：到特首辦公室一齊含笑食Fruit撻
原因：鬧佢無動於衷，不如喺董生面前吔Fruit撻，等佢唔好咁頹，等佢以為香港人關心佢，要笑住食喎，用愛感動佢，可能佢咁先會反省。
建議行動：在繁忙時間的彌敦道玩一字馬
原因：夠無聊嘛，無聊使乜解釋啫，最好叫埋哨牙珍、四方菓一齊去。
建議行動：到影音店問有否關心妍唱片賣
原因：咁咪無厘頭囉，襯晒快閃黨啦，明知無得賣都要問？
建議行動：去麥當勞問有無魚蛋粉賣
原因：重要用純正普通話問喎，咁無聊，等職員鬧吓你哋都好。
建議行動：到警署門口大喊：「快閃黨，戇X！」
原因：成班低能仔都唔知玩乜，夠薑就二三百條友一齊去差館門口爆粗，等差佬拉晒佢哋，低能仔，XYZ@$#……
建議行動：去榕樹頭跳高拍樹5分鐘
原因：影響到人做生意，或者嚇親人嘅行動唔好搞喇，要無聊嘅，就無聊拍樹喇。
訪問20位市民，佔8成認為甘小文與MC仁的建議行動最值得支持，看來普遍香港人都不屑快閃這無聊玩意。
