南非女星查理絲泰朗（CharlizeTheron）外形有幾掂，唔使講好多男影迷都應該好清楚，模特兒出身嘅佢樣靚之餘，重有成五呎九吋高，唔做幕前就真係嘥晒。不過查理絲為人比較低調，唔會好似籮霸咁識製造新聞，再加上佢同未婚夫史釗活唐辛（StuartTownsend）鬼咁恩愛，喺充斥緋聞嘅荷李活真係比較蝕底。
二十八歲嘅查理絲踏入影圈都有十年八載，佢較早期嘅作品《追魂交易》同《總有驕陽》等，都係演繹一啲要男主角呵護嘅角色，不過近年查理絲喺戲入面嘅形象有咗唔少變化，好似佢同麥克華堡（MarkWahlberg）、愛德華羅頓（EdwardNorton）合演嘅動作片《天羅盜網》，佢扮演一個頭腦冷靜嘅開夾萬專家，性感之餘亦有硬朗一面。
而查理絲喺改編自真人真事嘅新片《Monster》入面，更加放棄靚樣，化身面目猙獰嘅女殺人犯。查理絲喺部戲入面扮連環殺咗七個男人嘅AileenWuornos，而呢位咁凶殘嘅女士舊年已經喺佛羅里達被處決。