江山代有人材出，繼奧雲、朗尼、米拿之後，前晚英超聯又有新星出現，佢就係以十六歲之齡上陣嘅列斯前鋒連倫！
前晚熱刺主場對列斯，客軍喺下半場用連倫換入前鋒維杜卡，就造成咗連倫以十六歲零一百二十九日之齡，成為歷來最年輕球員喺英超聯上陣嘅紀錄。舊紀錄係高雲地利球員麥錫菲，於九九年二月以十六歲零一百九十八日之齡上陣保持至今。而如果連倫喺二百二十多日之內喺英超入波，更加可以打破埋同樣效力列斯嘅「師兄」米拿，喺上季「拆禮物日」對新特蘭時入波嘅最年輕球員英超入波紀錄㖭！
雖然連倫乜都係最細個，但前晚佢後備出場嗰陣就嚇咗我求大俠一跳，竟然係一個鬍鬚濃密嘅「男孩子」，完全唔係奧雲、朗尼初出道嗰陣嘅𡃁仔樣！
秘魯前鋒比沙路喺上星期友賽墨西哥同人講手被趕出場，依例喺下一場波，即下月六號對巴拉圭嘅世界盃外圍賽停賽。秘魯足總拿拿臨喺呢場波之前安排一場對危地馬拉嘅友賽，等比沙路服役後對巴拉圭可以落場。為一個球員搞場友賽，可想而知比沙路喺國家隊有幾架勢。
李斯特城前晚力戰車路士僅輸一球，表現廣獲好評，衰就衰在唔知係佢哋球衣贊助商定係波衫啲質料有問題，好多球員波衫背面嘅人名字母唔係甩晒就甩咁半。話晒係英超球會，加埋好多球迷睇到呢場當日重點比賽，唔失禮至奇。連講波佬都忍唔住話啲名甩成咁，有時都認唔到邊個打邊個。
前晚曼聯作客紐記場波，曼聯領隊費格遜因為唔滿意球證雲尼判決，喺場邊爆粗。結果雲尼整張紅牌呀爵爺歎吓。事後爵爺就好歎咁上咗去紐記領隊卜比笠臣個辦公室睇波，以遙控形式調兵遣將，難為曼聯龍門訓練員葛頓跑上跑落做咗傳聲筒，幾廿歲都咪話唔索氣。
英甲新特蘭前晚作客贏普雷斯頓，總算終止聯賽十七場連敗走勢。原來如果新特蘭再輸，就會平咗達雲隊喺一八九八至九九球季連敗十八場紀錄，領隊麥卡菲賽後話隊波能夠終止連敗，全靠班球員放開懷抱比賽。今晚新特蘭又有比賽，即管睇吓呢招踢輕鬆波係咪咁掂？