回憶永遠是最美好！如果唔係，點解啲人會用幾千蚊，買隻俾人玩過嘅舊超合金、唔打PS2反而買盒舊陳皮嘅紅白機Game帶？街機近來「潮點」係隻「新」出嘅300合1懷舊Game，全部舊陳皮兼超靚3D畫面欠奉，不過照樣打到排晒長龍，機迷昌哥每個禮拜日更要玩足二百蚊先止到癮，真係騎呢到痹。
記者、攝影：朱崇德
逢星期一至三、五出版
認識昌哥，每逢星期日晚都見佢「暢」成二百蚊Coins放喺機面，一打就打到閂閘落舖：「都冇入機舖好多年喇，近來有朋友話出咗部300合1新機，全部舊陳皮懷舊Game，點知一打就上癮！」，「好似《成龍》、《雙截龍》、《街霸》全部都係陪住我呢代嘅人長大，當年細路哥冇錢，死慳死抵慳埋食飯錢去打，入到去又未夠秤，唔係俾藍帽子趕就係俾訓導主任捉，真係冇日安樂機打。𠵱家咁迷，又好大成數同啲人玩懷舊玩具一樣，係一種補償心態。」。
「好多人笑我，車！呢啲Game網上Emulator大把任Download啦！使乜嘥錢落機舖打$2舖？落機舖最享受嘅，就係打得勁俾成班人圍住嗰種滿足感，呢2蚊我覺得係不蝕反賺。」
小記打開300合1遊戲選單畫面，問昌哥打過邊一隻，佢口中所認得嘅大概有七、八成，而且重好歡天喜地詳細講解佢嘅打法同死位，「𠵱家啲新Game一味追求畫面靚、但玩法勁亂，唔合理嘅電腦敵人，想一舖爆機幾近冇可能；玩番舊Game，每次一舖爆嘅感覺，真係令我有重振雄風感覺，問我幾時會打厭呀？等我將300隻Game全部打爆晒先啦！」。
我喺中環返工，基本每逢Lunch或放工時間上，不論白領或OL，都好多人輪呢部「手指指」玩嘅《暗棋》，玩落先知台灣玩法同我哋一般玩開好唔同，遊戲大原則是以大食小，排法係將、士、象、車、馬、兵（兵又反轉頭食將），而炮就特別啲可跳過一隻棋嚟食。Hit起嘅原因係考腦筋，而且磨時間，唔似其他Game一味考「手技」，鬥出波、昇龍咁膚淺，我知公司度啲人直情十幾二十蚊買盒中國象棋返嚟，偷偷喺茶水間開局練棋，唔識玩千祈咪自認係「潮人」！
我由《拳皇98》已經開始玩，機舖朋友都叫我「女拳手」，起初見隻Game叫《臥虎藏龍2003》但就用晒拳皇角色，真係好鬼騎呢，後來先知佢學當年《街霸：東方不敗》咁，建基於《拳皇2000》改出嚟，真係搞鬼。
改Game人都好有心，將最多人喜歡用嘅兩隻人物改到好勁，八神出波就變成「八酒杯」，草薙京普通出招都用到超秘技「無式」、儲氣變6Level、Strike任何時間出到，講真原裝版都冇打得咁爽咁過癮。早知係咁，個Game賣畀台灣改Game佬可能更會將佢發揚光大喎！
