李萬祺昨日出席雜誌舉行的車手頒獎禮，手上仍戴着婚戒的他表示看見已分居的妻子余安安拍戲養兩女兒，大感心痛。他聲言余安安永遠是他的最愛，並發表愛的宣言說：「我努力緊，如果可以，等我。」但余安安卻表現得無動於衷。
李萬祺、方中信及車手李英健昨日往九龍塘又一城，領取由《車主》雜誌頒發的「Oris傑出車手大獎」，三人均獲贈價值一萬二千元的OrisChronograph手表一隻。
自傳出與余安安婚變後，李萬祺大幅減少出席公開活動，昨日他頓成焦點，談到近況，他說：「好努力工作，希望手頭上啲project傾得成，另外我重希望十一月參加房車大賽，努力搵緊贊助。」
問李萬祺努力工作是否想取悅已分居的妻子余安安？他說：「想爭取可以得到嘅嘢，係必然嘅，見佢出番嚟拍戲，我都覺得心痛同戥佢辛苦。」
昨日見李萬祺仍戴着婚戒，他說：「我一向都keep住戴嘅，佢（指余安安）可能唔係啦，我就算唔望隻戒指，晚晚瞓都會好感觸。」問他有否致電余安安？他說：「我有打畀啲女，佢嘅嘢就喺啲朋友度知道，我知自己令佢失望過。」
問李萬祺會否害怕余安安有追求者？他說：「都唔怕得咁多，佢keep得咁好，有人追都好正常。如果有人對佢好，可以照顧兩個女，我會好安慰，𠵱家我真係冇時間做到呢樣嘢，以我所知佢𠵱家重未有追求者。」
是否仍然愛余安安？李萬祺說：「係。」婚變是否因為他曾受到誘惑？他說：「𠵱家我單身，係正常男人，同女仔約會好正常，安安喺我心中，仍然係最好嘅，仍然係我嘅最愛。」
李萬祺續說：「𠵱家我嘅目標唔係拍拖，係為咗做丈夫同做爹哋嘅責任而努力，我重新整頓後會追番佢，佢睬唔睬我就唔知啦。嗰陣時大家咁艱難，我重去玩，咁佢咪對我失望囉。」
現時經濟有沒有困難？李萬祺說：「我生活好簡單，冇乜問題，即使有問題，都唔會搵安安，有好多朋友照顧我。」問他有沒有說話向安安說，他深情地說：「我努力緊，如果可以，等我。」其後記者致電余安安，告知她李萬祺的愛的宣言，她冷淡地說：「我冇嘢講，唔好意思。」
採訪、攝影：RitaLeung
