以真實為賣點嘅模擬戰機遊戲《SIDEWINDERV》日本就已經見街，而響出街之前幾日有關方面就響秋葉原搞咗個Event，搵嚟兩個妹妹仔着到鬼咁Sexy去做宣傳，拉啲路過嘅人埋去試玩台，然後企響佢哋側邊教佢地點揸飛機，搞到現場迫滿晒人。千祈唔好問我究竟點解會揀兩位姐姐去做宣傳（唔通搵阿叔咩），亦唔好問我點解佢哋要着咁少布嘅衫（咁大熱天時着得少好正常吖！），更加唔好問我佢哋同隻Game有乜關係又或者有冇教練牌（呢個已經唔係重點），淨係睇佢哋吸引到成班麻甩佬埋去影相同試玩，就已經知道呢個活動非常成功啦！其實呢隻GAME本身都有一定嘅戰績㗎，《SIDEWINDER》系列第一集響六年前（1996）1月推出，到今年為止累積銷量淨係日本都有六十萬隻以上，絕對唔係嗰啲好睇唔好玩嘅三四線Game，未接觸過嘅朋友可以趁呢個機會試一試。
文：貓仔Ryo
作者介紹
曾任職香港遊戲雜誌編輯，現於日本讀書及工作。