中村博文，東京人，某次回鄉探親，在東京街頭遇上一頭黑豬，沒想到就此「一見鍾情」。黑豬有一個很潮的名字，叫Tokyo-X。中村滿心歡喜想把牠帶到香港，而一個人與豬的故事就此展開。
記者：李敏怡 攝影：陳陶鈞
逢星期一至三、五出版
來了香港十八年的中村，是一間高級日本料理的大廚。在他工作的料理店，開業二十多年來都沒有豬肉的菜式，直至今年，事情才有了變化。
家鄉在東京郊區的中村，每年都會回日本探親。今年，他也如常回日本，但沒有想到在東京街頭，他遇上了令他畢生難忘的牠。
「每次回日本，我都會留意當地嘅食店流行乜嘢，有啲咩新材料。今年年頭，喺間食店食到Tokyo-X。」中村說。
當了廚師二十多年的他，從來沒有嘗過如此驚為天人的黑豚肉。他說Tokyo-X的肉質比著名的鹿兒島黑豚肉更嫩滑，不用鎚不用打鬆，便可以做到入口即溶的效果。
幾經打探下，他先發現此豬得來不易。人說十年樹木，Tokyo-X是七年成豬。
「喺1990年日本嘅東京都畜產試驗場，研究將四種黑豚混種，包括有鹿兒島黑豚、英國黑豚、Duroc黃金豚同埋北京黑豚，經過七年的時間，喺1997年才出世。由於呢個Project以X做代號，所以隻黑豬亦叫Tokyo-X。」中村說。
於是他便打算把牠帶來香港，卻發現：「訂貨時先知道呢隻豬非常矜貴，一個月只賣三百隻，東京亦只有五十間食店攞到這種豚肉，唔係有錢就可以訂得到。」
亦即是說，中村要訂Tokyo-X，便要同日本嗰邊搶貨。現在大約一個星期入一至兩次貨。「但係如果要食，最好還是事先預訂，因為貨源唔係好穩定。」他說。
Tokyo-X黑豚肉「可塑性」非常高，煎炸燜煮，甚至鐵板燒統統都得。首先，我們便來個鐵板厚燒。坐在枱旁，只見厚厚的黑豚肉被放在鐵板燒，不消半分鐘，豚肉香味滿溢，令人垂涎三尺。被燒得金黃的豚肉，入口鬆軟，肉汁香濃，絕唔會「乾爭爭」，趁熱食還會嘗到醬汁的牛油香。
一塊炸豬扒賣到差不多二百蚊？！單看價錢真的令人有點驚訝，但試過後你卻會知道貴的理由。黑豚肉以瀨戶內海的海鹽調味，然後蘸雞蛋，再上麵包糠，最後落鑊炸。將剛炸好的豚肉加少許青檸汁，點少許鹽，咬落去外層夠脆，內裏肉質卻出乎意料地嫩滑，𡁻唔夠兩下，嚿黑豚肉更喺不經意間在口腔裏溶化，突然消失！
這道日式東坡肉，多食都唔怕油膩，皆因師傅先把豚肉燒一燒，去掉多餘的肥油，然後用熱水「拖」兩次，再走油，最後用醬汁燜三個鐘，煮出嚟嘅豚肉已經成功「瘦身」，唔會有成吋厚嘅肥膏，而且充滿肉汁，嫩滑非常。
以為牛肉至可以做沙律，估唔到豚肉都可以做冷盤。煙豚肉是師傅自家製的，加上橄欖油、青檸汁一齊食，味道清清哋，最啱夏天食。
鬆軟唔黐牙
Sandy：「炸豬扒最正，平時食開嗰啲會黐牙，但呢個炸黑豚肉好鬆軟，入口即溶，食晒都唔滯。」
電話：23686138
地址：尖沙嘴梳士巴利道18-24號新世界中心L057
營業時間：12:00nn-2:30pm 6:30pm-10:30pm