大使呢幾日出去做嘢，經過旺角呢個書局集中地，見到唔少父母帶埋仔女一齊去買書。
有父母同大使呻，新學年嘅書簿費幾「和味」，最起碼都要二、三千蚊，如果屋企有一條「化骨龍」以上，條數幾襟計。啲錢鬆動啲嘅當然可以買新書，荷包輕飄飄嘅咪惟有買舊書囉，重要求神拜佛出版商大發慈悲，唔好改版。
蘋果日報慈善基金一向都緊貼社會脈搏，知道近年經濟一沉不振，所以喺教育方面，我哋設有「蘋果助學金」，援助一啲有經濟困難、但成績優異嘅學生，希望佢哋唔會因為屋企嘅經濟問題而影響到學習，甚至要輟學，等佢哋將來學有所成，成為社會嘅棟樑。
「蘋果助學金」已經踏入第七屆，各位有需要嘅同學可以問學校攞申請表，或者寄一個貼上一元四角嘅回郵信封畀我哋索取，但係要等到九月一日先喎，因為接受申請日期由九月一日開始至三十日，「暖流版」稍後會作詳盡報道，大家記得留意啦！評審準則除咗從學業成績、家庭經濟狀況、操行等方面去畀分，今年加埋社工或老師推薦，以及參與課外活動、社會服務等多方面去衡量，務求做到更加全面同公平。大使順帶一提，攞緊綜援嘅家庭，因為綜援金入面已經包括書簿津助，為免重複資助，所以係唔合資格申請「蘋果助學金」㗎。
暖流熱線
電話：29908688
傳真：23702192
電郵：
網址：