孖T小霸王與大頭蝦
Maggie瘦雞變肥豬Mandy遭妹插眼

英皇孖T的劉思惠（Maggie）小時候暴瘦暴肥，花名由「瘦雞」變「菠蘿油」。至於蔣雅文（Mandy），自小就因頭大而四處撞壁，又常被妹妹欺負，有次更險被妹妹插眼而失明。

英皇3T中的劉思惠和蔣雅文，性格南轅北轍，Maggie是出名的破壞王，而Mandy就從小被妹妹蝦到大，平日不是撞牆就是撞柱，認真大頭蝦。

Maggie反轉酒樓
Maggie幼時很瘦，綽號「瘦雞」，但長大後開始胖到不可收拾，花名變為「菠蘿油」，日前她在電話中笑說：「嗰時係發育期，好鍾意食嘢，到咗中學直情漸入高峯。中二嘅時候，去到一百五十磅，三十四吋腰，又戴眼鏡喎，成隻豬咁。有次我同媽咪買牛仔褲，最大嗰條都唔啱我着，阿媽係咁笑我，我好嬲，於是搏命做運動減肥。」
Maggie續說：「我細個好百厭㗎，率領啲小朋友一齊曳，又成日周圍走，去酒樓撞瀉人哋捧住嗰盆魚翅，又拆爛人哋屋企盞水晶燈。」

Mandy最易弄傷
而Mandy是個大頭妹，加上性格大懵，就算現在也常撞親頭，她在電話中說：「所以我鍾意留陰，因為額頭成日撞到紅紅腫腫。我六、七歲嘅時候，喺屋企跳帆布床，唔知點撞咗落床邊條鐵，撞到穿頭，成頭都係血。」
Mandy有一個比她小九歲的妹妹，妹妹有次竟把膠手鈪打橫插向Mandy的雙眼，她說：「嗰時對眼痛到開唔到，我重以為盲咗，後尾右眼有撻瘀血，成年之後至散晒，以前妹妹好鍾意插我對眼，嗰次之後就唔敢咯。」
採訪：朱芷瑩