經過上星期，車迷嘅注意力集中響新車同個別車款減價之後，近期香港車壇有則傳聞，可謂甚囂塵上；亞Mark據知早輪提及過嘅瑞典富豪汽車代理權，將於今年底易手予新加坡集團，雖然重未見雙方動筆落實，惟現今富豪代理手頭上嘅存貨，計埋Showroom嘅陳列車，都不過15部左右，清貨埋帳嘅時間都可謂相距不遠。至於遲吓富豪新代理香港揸Fit人，傳聞會由現任積架GM嘅譚Sir（AndrewTam）出任，若然屬實的話，以譚Sir響車壇有咁耐年資同豐富經驗，可謂勝任有餘。然而，有小道消息話積架代理權，或許亦會轉投富豪同屬嘅新加坡集團，亞Mark睇嚟成事嘅機會不大，皆因現時擁有積架代理權嘅英之傑集團，跟積架車廠淵源甚深，加上歐洲唔少積架代理商，都係由英之傑出掌，看來易主嘅機會可謂微乎其微呢！