唐英年做咗財政司司長後，好多人都話佢腳頭好，計八方話佢人緣就更加好。前晚自由黨主席田北俊就借出半山豪宅，為唐少筵開兩席，宴請立法會七黨代表及商界老友，包括民主黨正副主席楊森、李永達、民建聯、自由黨、早餐派議員、信和置業主席黃志祥及恒基副主席林高演。不過前綫嘅劉慧卿、民協嘅馮檢基同職工盟嘅劉千石唔喺香港冇出席。
唐太郭妤淺除咗負責當晚食乜餸，同埋喺廚房指揮之外，重成晚滿場飛，為丈夫四圍勸酒，打好關係，真係入得廚房出得廳堂，非常幫得手。比起要收埋個太太嘅前任財爺阿松，唐少自然幸福得多。
不過力撐老友嘅田北俊，另一方面亦要趁7.1之後自己民望躍升嘅大好機會，為自由黨招兵買馬。有人前排見到自由黨觀塘區議員孫啟烈同一啲同僚聚餐，席間田北俊更好似美國前總統克林頓咁，扮咁啱路過，叫佢哋支持自由黨。八方則聽聞自由黨正向獨立無黨派、立場又傾於民主派嘅區議員招手。
八方問田少有冇此事，田少笑住話乜八方咁叻咁都知。其實劉炳章亦一直係自由黨嘅游說目標，劉炳章就話佢入唔入黨由選民決定，「我自己都主宰唔到自己嘅命運」，不過7.1後的確有佢界別嘅人叫佢𠵱家可以考慮吓加入。
傳真︰2623-9278
電郵︰