大市上星期喺大量游資充斥下繼續被掃高，香港遊除咗益香港之外，對梳打埠的經濟都有正面影響，皆因部份同胞嚟香港之後，可能會順道去澳門玩番兩手。
上個禮拜咁啱有人話會注入啲澳門賭權入去上市公司，搞到幾隻有賭場概念嘅股份勁升。有澳門朋友講，要留意一下隻嘉華國際（173），皆因佢哋本業喺99年後一直萎縮，𠵱家正係向上市公司注入新資產嘅最佳時機。呢位朋友話，大股東之前已經攞到澳門賭牌，喺呢個關鍵時刻應該出動王牌，預計短時間內會有公布。隻股上個星期已經勁升兩成，如果傳聞係真嘅，相信重會有力，不妨留意。
另一邊廂，喺祖國華東地區經營超市業務嘅聯華超市（980），上個星期尾段升破5元大關後，再以強勁爆炸力升抵6蚊水平。佢哋業務覆蓋面唔單止有超市業務，就連邊際利潤較高嘅便利店都有份，食正國內生活質素逐漸改善對零售業發展有利呢一條水。有個朋友喺上星期四未郁嘅時候，已經叫伏勝留意吓呢隻股份，話上市時班大戶已經圍晒飛，喺無乜街貨下，短期內炒上一倍都唔奇。用上市價3.88元計，Double上就即係7.8元，就算以上星期五收市價6.10元計，歷史PE都只係11倍左右，即使炒到上去目標價都係大約14倍，以現今市況而論，唔算離譜。
伏勝