到馬會食自助餐，碰到樓神C一家在座，於是走過去打招呼，順便問吓樓神C：「呢次推出豪宅樓盤，會否一Q清袋。」樓神C眉開眼笑咁話：「托賴托賴，賣得十分好，有希望賣清光㗎。」點解咁好賣呢？樓神C話：「講位置、講包裝、講環境啦，呢輪氣氛轉旺，賣豪宅未驚過，幾年來積聚嘅購買力，開始釋放出嚟嘞！」
一味講豪宅，其他上車盤又如何？樓神C好謹慎咁話：「重要慢慢嚟，平貨反而冇貴貨去得咁快！」左丁山心諗，失業率高企之下，中下階層人家擔心失業，買樓唔係咁易。啲中上行政人員、廠家等等，有能力調動資金，買貴價樓唔使手軟，故此出現豪宅暢銷，普通住宅有待消化嘅現象，況且內地遊資，亦係聚焦於豪宅也。
樓神C原來與鄭大班嘅拍檔皮蛋林係校友。據皮蛋林話：「樓神當年成日去搞運動，反釣反貪污示威，實有佢份，校方頂佢唔順，勸喻佢唔好返學。」呢個勸喻就錯晒嘞，今日間間大學都叫校友捐錢，樓神C理應可以為母校出一分力，但母校當年不視他為學生，今日點有面皮叫佢捐錢？古語話：「寧欺白鬚翁，莫欺少年窮」，就係咁嘅道理。少年反叛反建制，多數係叻仔。周校長當年經常與樓神C開會策劃遊行，與銀行界鄭大班都係反建制型。佢哋幾個人今日一個做銀行大班，一個做校長（仍然經常示威），一個做咗俗稱所謂樓神，一個做咗大編輯，所以，啲校長唔好睇低示威學生呀！