德國歐寶汽車，近年先後為旗下車款推出新一代版本，當中包括Corsa及Vectra車系，全都備受車迷追捧；而響嚟緊下月初舉行嘅法蘭克福車展上，廠方又會展出全新第3代Astra車系。新車不但造型較前變得年輕，就連車廂布局及機械配搭都經過重新設計，定能予人耳目一新之感；不如今日一齊嚟先睹為快，睇睇新車有何吸引之處啦！
記者：鄭達基
海外車訊
原有歐寶Astra嘅造型，都係傾向走成熟踏實路線，但呢款將於嚟緊法蘭克福車展曝光嘅第3代型號，賣相明顯要來得年輕富活力感，望落倍見有一份吸引力；當中不可不提一組附有AdaptiveForwardLighting（AFL）技術嘅頭燈，一對Bi-Xenon可緊隨軚盤轉向角度而調節照射範圍，晚間行車安全度因而大幅提升。除此之外，新一代Astra更備有響歐洲地區十分啱用嘅Quickheat系統，呢套系統能令經過清理雪迹後嘅擋風玻璃，霞氣不再重現，令視野變得清晰呢！
新一代Astra除造型有大改動外，廠方亦為其重新設計車廂布局，務求能予人有一新耳目之感；當中最大賣點會係由於新車尺碼有所增加，故此連車廂空間亦較前來得寬敞闊落，匹配前後兩排承托力極高嘅座椅，乘坐舒適度明顯提升不少，加上開啟幅度有所增加嘅車門及低地台設計，乘客上落車亦見方便得多呢！至於車廂設備方面，除有齊原廠冷氣及高級音響組合外，中控台頂端更備有一個6.5吋嘅屏幕，駕駛者能輕鬆容易控制車上各項設備，又或者閱讀行車資料；另外亦可透過軚盤上嘅遙控按鍵，控制車上各項設備，既方便又安全。
廠方為顧及不同用家嘅需要，響推出新一代Astra車系時，特別配備有多台擁有不同輸出數值嘅電油及柴油引擎供選擇；當中分別為1.4及1.6公升引擎型號，更備有最新嘅TWINPORT技術，除能做到有強勁動力輸出數值外，而且亦能做到有特低耗油量嘅表現，而一台2.0公升TurboECOTEC引擎，經過廠方精心調校後，分別能夠輸出高達170及200匹馬力，輔以一套6前速手動波箱，起跑加速既敏捷又順暢，性能表現更係毋庸置疑。另外，新車底盤結構經強化外，更備有全新IDS懸掛設計，匹配多套電子系統，無論日常行車，抑或係過彎時都可有不錯嘅循迹表現呢！
