今個暑假對效力澎馬流浪的奧運隊門將高志超，以及晨曦中場潘文迪可說特別充實，因為這兩位帥哥在這「唞暑」期間同樣踏足娛樂圈。高志超已於早前簽約加入「加際星藝娛樂公司」接受培訓；潘文迪則擔任電視劇《功夫足球》的足球指導兼客串一角。不過，兩人異口同聲表示，現時首要是踢好足球，至於日後是否投身娛樂圈則要看際遇了。 圖/文：曾雁平
「我有個識咗好耐，響電視製作公司做嘢嘅朋友，佢間公司準備會拍《功夫足球》，問我有冇興趣幫手做呢套戲嘅足球指導，而見暑假有時間就答應，上廣州試吓。」
「我響套戲裏面主要係指導演員，點樣做至可以令到踢波動作真實啲，而我重客串做反派隊教練㖭。冇拍廣告幾年，今次再對鏡頭初初幾陌生，但好快就適應，有時喺片場會留低睇人拍戲同係點企位。」
「好多人話啲明星好難相處，但我接觸過佢哋又唔覺，眾多演員中同張偉健、林曉峰最好傾，因為佢兩個都鍾意踢波，而同張偉健傾開先知佢十二歲時曾踢過南華青年軍，成日畀教練吳偉文（飛哥）鬧。」
「踢波唔可以踢成世，如果將來有咁嘅機會，當然有興趣向呢方面嘗試，只係一切要睇機緣，亦冇得強求，而呢幾年都重想專注於足球事業上，希望今季轉會晨曦可以幫到球會攞到好成績。」
「過去幾季響南華浮浮沉沉，最唔明點解，成日踢幾場又冇得踢，又經常踢唔同位，亦試過喺決賽入波幫球會捧盃，但最後都唔到球會重用同信任。
既然離開南華，亦再沒必要諗住過去，而今季轉會晨曦只要有機會就一定盡力做到最好，希望有正選，幫球會攞晒四個錦標，如果可以入番港隊就最理想。」
