可稱得上係福特汽車旗下，最受車迷歡迎車系之一嘅Focus，由推出至今已有多年時間，雖然期間曾推出Facelifted新版，但礙於外觀及車廂布局並未作出太大改動，或多或少會予人看膩之感；到最近，外國方面就有消息傳出，指福特廠方正密鑼緊鼓研製新一代Focus車系，並預算於2005年推出市場。
該消息指出，新一代Foucs將會用上新款C-Max嘅底盤作設計平台，故此車身尺碼會較現有型號有所增加，從而令車廂空間來得更見寬敞，就連車廂設備亦有所改動，乘坐舒適度亦因而提升不少；至於造型方面，新車會用上酷似現有Mondeo車系嘅設計，除擁有一對炯炯有神嘅頭燈組合外，襯埋鑲以電鍍框邊嘅闊大鬼面罩，令車子望落更見有一份誘人魅力。另外，新車又備有多台引擎供用家選擇，當中包括入門版嘅1.6公升引擎（馬力108匹），以及一台擁有134匹馬力輸出嘅2.0公升引擎，除能造到有強勁動力輸出表現外，就連耗油及廢氣排放量亦較現有型號有所下調。預料新車將會於明年舉行嘅法國巴黎車展中亮相，並會緊隨於2005年推出市場。