【本報訊】中秋將至，又是一嘗大閘蟹的好日子。雖然陽澄湖今年大閘蟹產量減半，但近年大閘蟹產地已遍及太湖及長蕩湖等地區，本地售賣大閘蟹的老字號及酒家預期今年蟹價不會飆升，由於近年內地居民消費力極高，料將搶去不少肥美多膏的「靚蟹」。 記者翁煜雄
中新社報道，為改善水質及保持大閘蟹品質，陽澄湖今年只產八百五十噸大閘蟹，較去年減少一半，但外銷蟹量卻達三百噸，是去年二十多噸的十多倍。不過，銅鑼灣上海老三陽負責人祁玉鳳表示，陽澄湖近年發展工業，水質受影響，產蟹量及質素不及過往，其他地區近年則紛紛出現大閘蟹養殖場，供應已趨穩定。
她說，江蘇的太湖及長蕩湖近年出產的大閘蟹品質甚佳，雖然有關地區曾遇暴雨洪水，但蟹質反而更好：「以前我哋以為雨水會沖走啲蟹，原來反而沖嚟更多食物，啲蟹重肥。」她說今年大閘蟹售價料與去年相若，但仍有隱憂：「因為近期全世界天氣都熱咗，溫度唔夠低會影響蟹嘅質素同數量。」
港人鍾情吃大閘蟹，「靚蟹」都運往本港，部份新加坡及台灣等旅客，甚至內地居民都來港嘗鮮；她說情況已不同：「你睇自由行啲內地客買嘢幾豪就知佢哋消費力幾強，𠵱家部份靚蟹會內銷，搶咗香港唔少靚蟹㗎。」
祁玉鳳說，大閘蟹價錢豐儉由人，最平二十多元一隻，但體積較小：「細都可以好好味。」一般一隻「可以請客，見得吓人」的大閘蟹，平均售價約百多元。
灣仔東園金閣海鮮酒家張經理稱，大閘蟹約於下月初抵港，中秋時品質更佳，內地現時報稱的來貨價與去年相若，該酒家今年繼續以來貨價每隻三十八元或六十八元發售：「加埋人工係蝕㗎，但可以吸引啲蟹迷嚟晚飯吖嘛。」他相信銷情理想，但認為消費力高的內地居民會搶去不少靚蟹。
食家劉健威說，大閘蟹膏味道鮮甜：「俗語話九月圓、十月公」，即是農曆九月以蟹肚呈圓形的蟹乸較肥美，十月則以蟹公為佳；由於近年產蟹地甚多，消費者最好光顧老字號或相熟舖頭，以免購入劣質甚至假冒大閘蟹。他又說大閘蟹性寒，配以紫蘇葉及薑茶可助驅寒。
家庭醫生關嘉美則提醒高血壓、心臟病及糖尿患者不應吃大閘蟹，因其膽固醇含量極高：「年年我都係咁講，唔好話我長氣呀，真係好高㗎，就算好人好姐都食少啲。」她又說不可同時吃蟹及柿子，否則會導至腸胃不適。
