二人男子組合Shine嘅天佑同Cookies嘅Miki呢對緋聞情侶，俾人傳咗好耐，但係就算早前一齊去睇騷俾人影到，依然唔認係一對。不過紙又點可以包得住火吖！
噚日Shine出席喺荃灣舉行嘅「健康第一大獎2003頒獎典禮」，天佑手腕上戴嘅表，就係呢排開始興嘅黑色對講機手表。
天佑話：「呢隻表冇牌子，要四百幾蚊，我用嚟打wargame，啲朋友都話靚，叫我幫佢哋買㗎﹗」
無獨有偶，Cookies嘅Miki前晚為《勁歌金曲》錄影，亦都戴住呢款手表。可能佢哋以為「神不知鬼不覺」，但係仍然都俾人發現到佢哋戴情侶表。
Shine喺活動上得到「十大健康之星」，對於緋聞纏身嘅天佑會唔會怕唔係「實至名歸」？佢話：「拍拖唔健康咩？對年輕人好正常呀﹗」
另外，Cookies噚日分別喺葵芳同藍灣廣場行Catwalk，Miki已經冇戴嗰隻表。問到Stephy露臍又露腰怕唔怕男友李燦森呷醋，佢話：「邊個係我男友呀？唔係呀﹗」
蕭正楠﹙Edwin﹚噚日出席喺尖沙嘴舉行嘅「你想我點音樂會」，同數十位Fans聚會，唱咗多首歌曲。
Edwin自爆為咗今次嘅活動，緊張咗好幾日，佢話：「真係好緊張，搞到去廁所時屙咗啲紅色嘢出嚟，呢幾日又發覺個胸口好痛，但都冇時間去睇醫生，點都要做埋手頭上啲工作至算。」
陳淑蘭噚日喺荃灣出席宣傳活動，重即場親自炮製美食，有聲有色。之前蘭子同舊愛祁文傑公然手拖手，想話俾人聽冇嘢都好難，但噚日蘭子就死口唔認復合，佢話：「拖手冇咩所謂吖，只係一種親密表現，但我哋真係冇嘢，連佢都叫我同傳媒澄清吓。」
早前有報道話利嘉兒冇得做《勁歌》主持，係因為松松姐姐同無綫高層芭姐投訴，至令松松得保原位，利嘉兒噚日喺青衣城擔任司儀，佢話：「咁緊要？冇所謂啦，由邊個做都冇所謂，最緊要做得好睇。」佢重話自己之前都係做音樂節目嘅主持，根本呢樣工作對佢又唔係好新鮮，最緊要係喺公司入面乜嘢類型節目都可以試吓。
徐若瑄、周渝民同朱孝天噚日喺台中為台劇《狂愛龍捲風》做宣傳，但因為坐飛機嘅時候遇到氣流，徐若瑄為咗度過危機，佢叫大家一齊唱《手牽手》，搞到仔仔同朱孝天啼笑皆非，最後飛機終於安全降落。佢哋三人到咗現場，約一千名觀眾嚟捧場。
