朱茵前晚錄影無綫節目《勁歌金曲》，宣傳即將推出的新碟。提到過往的感情時，朱茵透露曾因被男友拋棄而傷心了整整一年，更經常以淚洗臉。對於舊愛周星馳近日的緋聞，朱茵顯得頗為反感，更以男友黃貫中做擋箭牌。
朱茵、女子組合Twins、Cookies、陳慧嫻及黃伊汶等，前晚在無綫將軍澳電視廣播城為《勁歌金曲》錄影。
提到過往的感情時，朱茵不諱言曾被人「飛」，她說：「女仔俾人撇好正常，我都試過俾人撇，唔啱咪俾人撇。其實俾人撇係面子問題，落唔到台，有第三者介入，被撇嗰個會好hurt，有俾人出賣嘅感覺，自己肯認衰女，認自己愛錯，喊吓排吓毒就冇嘢，等到再有第二個就冇事。」回想過往被拋棄的經驗，朱茵表示最傷心的一次足足傷心了一年，她說：「我最嚴重嗰次，一年就好番。」
近日周星馳再度傳出緋聞，朱茵甫聽到星爺的名字即說：「唔好提呢個人，人哋嘅嘢唔想講，唔關我事。」朱茵又以男友黃貫中（阿Paul）做擋箭牌，她說：「頭先咪問我阿Paul嘅。」問朱茵會否覺得星爺為人花弗？她說：「唔知，唔好推我去咁尷尬位置。」
而Twins的蔡卓妍（阿Sa）前晚被要求在陳冠希（Edison）、鄭伊健、劉青雲及Shine的黃又南四人中揀一個做對象，阿Sa說：「我揀伊健，我同佢拍過戲，佢似我大佬，好好笑容同好好玩，Edison太靚仔，又南太細個，青雲好嚴肅。」鍾欣桐（阿嬌）亦表示會揀伊健，但她強調和Edison經常有通電，未知是否有特別意思，阿嬌說：「我其實同Edison識咗好耐，平時都會講電話，但冇講心事。佢識好多人買波鞋，我搵佢買會畀番錢佢。」
此外，黃伊汶前晚以性感打扮載歌載舞，結果不慎春光乍洩，要助手陪同入洗手間整理了十多分鐘才現身，黃伊汶說：「我平時都有貼膠紙防走光，不過膠紙會令皮膚出紅疹。」
採訪：汪正文 攝影：陳志嵐
