已經俾唱片公司視為蝕本貨嘅安西纊子，呢排人氣繼續低迷，事業仍然冇乜起色，佢慶幸自己仍然可以喺啲時裝雜誌出現，吊住條命博曝光，不過我大口羅拉真係戥安西慘，佢真係霉到要淪落新宿啲人妖竇，幫啲蚊型宣傳活動拍寫真，但見佢仍然好堅強咁對住鏡頭搔首弄姿，真要讚佢夠晒專業。
公認「無事忙女王」嘅安西纊子，早排去咗新宿二丁目呢個人妖旺區影相，佢重搵咗姣情十足嘅金髮人妖Lily，同扮到成隻烏鴉咁嘅人妖楓楓，一齊扮成好姊妹。三位「靚女」喺鏡頭前老友鬼鬼，不過似乎Lily唔夠楓楓玩得咁盡。仍然搣唔甩男人味嘅楓楓影相嗰陣，向住安西左邊心口嚟個豬嘴啜奶嘅動作，簡直同安西擺出嘅好High表情互相輝映。
做唔到乜乜名牌代言人嘅安西，就惟有撈埋人妖娛樂場所宣傳大使，佢話落去同啲人妖玩吓，除咗有《色慾都市》嘅感覺之外，重可以消除疲勞，治療心靈創傷喎。不過，轉頭佢又走咗去啲蚊型HelloKitty騷扮Cutie，重將啲妖氣過埋畀Kitty㖭！