呂方與鄭裕玲（嘟嘟）拍拖十年，在這段愛情長跑中，呂方坦言女友一針見血的率性敢言曾傷盡他的自尊，而「傷痛」過後卻令他有所反省。呂方還大爆嘟嘟曾以洗腸後連喝七天樹汁的「斷食」法喼弗，女友同時亦要他禁飯減肥，令到呂方要偷偷外出食飯。
呂方與鄭裕玲拍拖十年，在呂方眼中，因他與女友都是性格率直的人，所以他們才合得來，而嘟嘟的坦承與直接，雖然是為呂方好，有時候也會傷了呂方的自尊，但呂方在「傷痛」過後，又會反省女友的忠言，始終嘟嘟夠真。
呂方曾經紅過，他形容自己當時被紅的景象蒙蔽，實際上自己卻是井底之蛙，於是嘟嘟就狠狠給他一記當頭棒喝，呂方說：「我新聞又唔睇，金融風暴又唔知，電費唔識交，地鐵唔識搭，出入又要保母一齊，做嘢要六、七個人喺身邊，但上台嘅時候，咪又係得你一個去面對，鄭小姐會令我反省，佢叫我搭地鐵啦，啲人要望咪望囉，生活體驗嚟吖嘛，鄭小姐有次同我講：『我當年去馬來西亞登台，一個人拎個化妝箱就行啦，邊似你一個人做嘢八個人陪呀！』」
早前兩口子拍拖看陶喆演唱會，臨行前，呂方問嘟嘟：「使唔使搵埋保母一齊去呀？」嘟嘟即說：「使乜保母啫？做乜唔可以睇演唱會？呢啲係你嘅生活嚟㗎！」呂方想想，覺得女友說得有理，令他心悅誠服。問他會否覺得嘟嘟惡死？他說：「我記得嗰時佢拍《男親女愛》，佢做嘢時會話人哋啲工作態度，我話你唔覺自己惡咩？佢話：『唔覺喎，我講理由啫！』嘟嘟係一個講道理、硬朗同好有智慧嘅人，所以我好尊敬佢。」
呂方續說：「出面啲人成日覺得我小男人，以為我好蝦，其實我絕對唔係，外面啲人會覺得嘟嘟太強，我弱小，私底下我係一個好直嘅人，我都有火㗎！」
呂方認為嘟嘟比他更直，所以有時他要拗曲她過份的直，呂方說：「佢對樣樣都好緊張，今日肥少少，聽日就要即刻減，呢樣唔食、嗰樣又唔食，有時同佢食飯都好慘，佢唔畀我叫飯食，一嚟係佢覺得我出番嚟唱歌唔應該肥，二嚟我又大食。我好鍾意食嘢，我食三碗飯㗎，我咪走出街偷飯食囉！我哋有好多嘢都夾到，係食飯呢樣就令我好煩惱。」
呂方表示，有次他發現嘟嘟吃了很多麵包，於是他問嘟嘟不怕肥嗎？剛洗腸後的嘟嘟這樣說：「之後我七日飲樹汁喎，你都試吓啦！」那次呂方才知道這叫「斷食」，可以在洗腸後停吃一至七天不等，只喝樹汁充飢，但呂方說：「咪搞我，你叫我唔食三個鐘頭嘢就得，食對我太重要喇！」
以前呂方曾因為外界狂踩他不配嘟嘟而生氣，不過現在他已看化，他更說：「我哋點相處你又唔知，佢係咪要嫁貴族至啱？我係咪蠢到成隻豬咁，要搵隻豬做老婆，又肥又醜就啱你哋口味？」
呂方與嘟嘟的相處之道，是在於互相給予對方空間及信任，呂方自覺對照顧小朋友未夠耐性，所以他與嘟嘟已有不結婚和不生BB的共識。呂方說：「結咗婚之後，有好多事就變咗『老奉』，如果唔結婚比較開心嘅話，我都贊成唔結婚。」
