「舊年暑假出席青少年足球推廣活動識咗足球大使劉德華，而幫佢出唱片嘅公司攞咗我聯絡電話。到今年三月，呢間公司問我有冇興趣參加佢哋辦嘅星級show比賽，我諗住踢波空餘時間比較多，又唔會影響到日常訓練，球會又唔反對，就決定參加，希望學多啲嘢。
受訓期間，有得學普通話、儀態，重有同人溝通嘅技巧等，另外大會重安排過劉德華同張達明等藝人主持座談會，同我哋班新人分享佢哋嘅多年來響演藝界所累積嘅心得同經驗；而經過受訓後，響六月嘅星級show，好好彩咁過到關，未來會邊踢波邊受訓。
由於公司好支持我踢波，而訓練又多數響夜晚，唔會影響到球會訓練同比賽，而我暫時會以足球為重，再兼顧演藝方面。」
「細個其實唔鍾意踢波，爸爸星期日朝早就睇《球迷世界》阻住我睇卡通片，但到中學開始跟同學踢波，而做龍門肯定有得踢，咁就開始做守門員。後來爸爸帶我去球場睇波，發覺原來現場睇波好過癮。
當時睇波最欣賞外援龍門威拿同德普洛夫；華人就鍾意鍾皓賢同范俊業。講真我只係踢咗幾年，完全冇諗過咁快可以入選港隊，重可以同佢兩個做隊友。目前最希望港奧運隊響奧運外圍賽有好表現。
雖然目前唔講得有乜嘢成就，但仍要多謝盧國華同我爸爸，如果冇佢兩個支持同幫助，我諗唔可能咁快入到港隊。」
