港股今個禮拜屢創新高，而且破得好輕易，日日都有大成交配合。恒指噚日高位10768，收市報10760，升117點。下個禮拜要見10800，真係話都冇咁易。
恒指本周累升336點，升幅3.2%，但計埋滙豐（005）及恒生（011）除息因素，實質升幅接近4%。過去兩周恒指共升815點，升勢相當急，技術走勢已全面轉強，淡友要唱淡亦愈來愈困難。
其實今個禮拜唔止港股強，外圍日股及美股亦屢創新高，全球主要股市普遍造好，證明資金流向確係出現改變，由債市流入股市。資金市難以由基本因素及技術走勢分析，所以話大市水浸唔好估頂，太過保守亦好難贏錢
恒指由4月尾展開升浪至今，累積升幅2352點，升幅28%，其間18周中只有4周下跌，最大跌幅只係303點，而且從未試過連跌兩周，可謂真正嘅大漲小回，等回吐買貨的投資者猶如阿崩叫狗，愈叫愈走，太過謹慎的散戶如趙飛雲之流，今個升浪未必賺大錢。
趙飛雲今個禮拜全無進帳，除咗因意氣沽咗九倉（004）外，其實亦係怕大市隨時調整。恒指周三尚在楔形頂10478爭持，好淡未分勝負，但周四以大陽燭上升後，淡友大勢已去，噚日再升已係大部份人意料之事。
期指下周結算，除非有突發事件，否則好友已穩操勝券，只要資金繼續湧入，再挾上一二百點仍無難度。
好友本周只利用地產股及長和作主力，讓滙豐休養生息，只要下周挾高滙豐及恒生，恒指要見萬一，亦非難事。
趙飛雲