彤叔捉住東東唔放手 - 李八方

  彤叔捉住東東唔放手 - 李八方

年逾七十七嘅新世界主席鄭裕彤(彤叔)最鍾意人哋叫佢彤哥,以示年輕,從噚日一件小事就可反映佢心境確實年輕。
噚日傍晚五時半,彤叔出席新世界有份參與、由聯合國兒童基金會搞嘅「同創美好新世界企業慈善伙伴」開幕禮,同場嘅嘉賓有前任政務司司長陳方安生,以及歌星陳曉東(東東)等。

「佢隻手好嫩滑」
八方只見彤叔五點鐘已到場,對呢件事好似相當雀躍,其後司儀邀請各嘉賓上前搞一輪儀式,跟住司儀叫東東留低講感想,點知彤叔當時已經同東東傾到雞啄唔斷,彤叔重拖住東東隻手唔放,十分親切,彤叔當時更唔知道司儀叫東東喺台上講嘢。跟住東東唔知點解,向彤叔行咗個拱手禮,彤叔反而拍咗東東一吓,表現相當熟絡。司儀跟住叫人請彤叔落台,儀式先至繼續進行。
東東其後同八方講,彤叔份人好熱情,大家事前未公開見過面,同彤叔拖完手嘅感覺係「佢隻手好嫩滑,重有一股暖意」。大家係咪覺得彤叔心境年輕呢?
另外,八方問彤叔,佢位契女明美連年底結婚,有冇諗過送乜嘢禮物呢?點知彤叔話重未收到通知喎,到時再諗啦。明小姐,好快啲向老人家報告啦。
(圖)七十七歲嘅彤叔雖然年紀大過陳曉東五十年,但傾起偈嚟好似完全冇代溝咁。
甄朝健攝


傳真︰2623-9278
電郵︰[email protected]