國企業績普遍有理想表現，到噚日為止，已有近7成國企派了中期成績表，以熱門股為例，最突出的非鋼鐵股莫屬，半年盈利增幅以3至5倍計；石化股除儀征化纖（1033）盈利大倒退外，其他都有交代，特別係北京燕化（325）賺多4.5倍，更令股東喜出望外，股價因此仍能企於高位。
國企早輪急升後，趁業績期進行整固，基金再作評估，會重新部署和換馬，但中長線看好的立場不會改變，特別係增長強勁者，仍會主力持有，甚至加碼。筆者認為，未來的國企升浪中，鋼鐵股仍會擔當火車頭角色。
3隻鋼鐵股，以盈利升幅計，最勁係馬鋼（323），半年營業額70.6億元（人民幣．下同），升37%，經營溢利11.5億元，大升5.6倍，每股盈利14.4仙，不派中期息。
重鋼（1053）排第2位，營業額26.1億元，升43.8%，獲利4億元，升3.8倍，每股盈利37.6仙，不派中期息。
鞍鋼（347）升幅最小，半年營業額69.4億元，升38.6%，獲利6.2億元，升2.2倍，每股盈利21仙，同樣不派中期息。
在此先岔開一筆，國企之前多不派中期息，但盈利大增之下，是否應酌量派息，益一益大小股東呢？特別係現時唔少國企已成為基金股，基金一向頗重視派息，筆者近日同芬佬傾開，佢哋對國企賺大錢而冇息派，唔係幾happy，若國企因此「小事」而影響到基金的「觀感」，可謂因小失大。
講番鋼鐵股，3隻之中，首選仍係重鋼，雖然下半年鋼鐵價格有可能從高位回落，但只要公司有效提高生產效率降低成本，高增長仍可持續，初步估計重鋼全年盈利8億元，每股盈利75.2仙（折71港仙），預測PE只為4.7倍。重鋼半年業績遠勝筆者的估計，今個月初，重鋼股價尚係2.35元，已推介話會「坐三望四」，現時「坐三」已實現，相信調整完成後，4字頭亦好快見。
睇番張圖，重鋼近期升得急，有回吐理所當然，但幅度估計唔大，可候回至10日線（約在3.11元）和20日線（約在2.7元）分段吸納。
郭兆誠