地產股噚日威威，帶動港股上升117點，突破10700，收報10760，成交接近150億元。新地（016）與恒地（012）分別升逾5%及4%，長實（001）亦升近4%。有消息話美資大戶覺得本港地產市道見晒底，加上睇好自由行同CEPA，將地產股投資評級調高。
97之後，樓市愈跌愈深，外資早已沽清地產股，即使仍持有，比重都是偏低甚至接近零，喺呢個時候基金一旦增持，反彈將會十分急。傳統智慧教落，地產股行先樓市6個月，即係話樓市明年首季便可反彈。
近期就業環境似乎好轉，一間會計師樓舉行大型招聘會，招請130個畢業生，阿虎所認識嘅公司，唔少都因為業務好轉而增加人手。只要香港人對就業前景樂觀，樓市就有可能急速反彈。
講到自由行資金湧港炒股，ｉ師傅話，國內人最鍾意炒細價H股，論細價股就非要留意東江環保（8230）不可，噚日收市價0.54元。東環雖然股價細，但連富達呢類大型基金都持有5.54%H股，而摩根大通及IG資產管理都各持有11.38%及9.56%H股。此股有咁多大基金持有，業務與前景當然有番咁上下，而最緊要就係貨源差唔多俾大基金吸乾，要炒起絕對唔難。
遠展系3公司昨日全面勁升，其中遠東發展（035）勁升39%至1元，成交更高達1.43億元。據聞，老虎仔曾與工業股「點金石」VP傾過偈。
阿虎