新任財政司司長唐英年藏有唔少紅酒，噚日佢喺工總午餐會上，俾人問到有關加酒稅嘅問題時，講笑話如何避嫌確係難題，因為減稅會俾人話佢貪買平酒，加稅就可能有人指佢乘機抬高藏酒價值，所以唐英年話寫財政預算案前，一定會諮詢各界意見，不過佢先旨聲明，希望大家都尊重佢嘅意見。
唐英年從政之路始於工總，噚日全場都係佢老友，工總噚日重贈佢一個金色座枱牌匾，上書「勇當大任、早建殊功」。佢演講時亦零舍風騷，話無耐前重以局長身份恭喜梁君彥榮任工總主席，估唔到幾個禮拜後就輪到工總賀佢做財爺，「政治家生涯真係充滿驚奇」。
答問環節時有個老友玩嘢稱佢做「財政司司長先生」，洋名Henry嘅唐英年即刻叫停，「PleasecallmeHenry.」
唐英年噚日又自爆有人批評佢，唔應該喺𠵱家放暑假撩起銷售稅呢個咁敏感嘅問題，因為冇乜新聞隨時成為輿論炮灰，佢卻話「Iamnotstupid.」刻意捧出個燙手山芋，係要向炒家顯示滅赤決心喎。
傳真︰2623-9278
電郵︰