古巨基嘅經理人同唱片合約簽咗畀黃柏高（Paco）三年，前晚喺北京舉行大型簽約記者會，因Paco嘅金牌經理人公司同北京嘅東方21公司結盟，所以旗下嘅藝人會加強發展內地市場。
基仔話簽咗畀金牌後，Paco幫佢推咗二十幾部電視劇，搵少好多錢，所以佢𠵱家只好專注籌備新碟，打算下月推出廣東碟，年尾再出國語碟。Paco解釋：「我想幫佢喺樂壇發展得好啲，雖然佢喺內地拍劇好有號召力，但一套劇要拍成三個月，一年咪拍得四部，若再花時間拍劇，要入返樂壇怕有困難。我哋嘅目標係開演唱會，到時收入一定高過拍劇，佢重要做最受歡迎男歌手㗎。」
基仔話：「Paco話我要着眼於大中華市場，所以記者會都喺北京搞。」其實馮仁昭都好耐未見過有公司花四十萬港紙，幫藝人搞咁大型嘅記者會，可想而知佢哋幾錫基仔。
關心妍日前去美國登台，點知發生小意外，喺佢唱完謝幕離開之際，竟然失重心撻咗落地，整親個盆骨，近膝頭哥位置又瘀咗，當晚重行唔到路。噚日關心妍早機返港，下晝就現身將軍澳拍MV，好彩見佢冇乜嘢，着住三吋高跟鞋重健步如飛，佢話：「𠵱家OK，今晚會去做針灸，最驚係內傷。」
最近有報道指無綫唔搵利嘉兒接替陳松伶做《勁歌金曲》主持，其實係因為松松不滿利嘉兒事先張揚，令佢好冇面，於是向藝員科高層芭姐投訴，松松先至搶灘成功。但馮仁昭知道松松同芭姐一向冇乜兩句，合約亦唔係芭姐同松松傾，芭姐又點會無端端幫松松爭取？俾人咁屈，又難怪松松咁㷫嘅！
陳慧琳（Kelly）近日失聲，佢噚晚出席商台喺九龍灣國際展貿中心舉行嘅《雲妮夜總會》戶外直播，但因為唱唔到歌，所以佢席間唔會唱歌同做訪問。而Kelly原本噚日中午要出席「童創美好新世界」活動，但亦因病缺席。
田蕊妮噚日喺清水灣同亞視高層開大會，佢明年二月就約滿亞視，但𠵱家重未諗去向問題。有報道話杜汶澤使佢錢，田蕊妮笑笑口話：「咁咪好囉，即係話我有錢，阿澤都好開心，食軟飯係佢畢生願望。」田蕊妮重話：「佢都係鹹濕嘅人，我有晒準備，如果有第二個令佢開心，Let'sgo！」
