大市水浸，近百五億元成交，再將恒指推高117點，收10760，萬一點關口在望。短期之內，就算唔造好，都咪隨便做淡，否則好易被挾傷。
聯通（762）上客增加，有人追捧，股價昨日突破5.85元阻力後，升勢加速，高收6.05元，大升逾6%，向上應該重有多少水位。
聯通有4件Call輪，升幅最大嘅9383，由1.6仙彈上3.8仙，大升137%，龍虎榜上排第2。9884升幅細啲，都有35%，剛啱名列10大升輪。其餘兩件，9657按盤價升114%，可惜全無成交；9936係鎖定回報輪，交投一向稀疏，昨升32%，成交得6張金牛。
搵聯通輪炒，點都要揀9383，呢件成交遠超其餘3件，昨日就有6億幾份易手，總值近2000萬元。不過，9383係末日輪，下月18日屆滿，時日無多，溢價3.5%，槓桿率15.9倍，並不便宜。炒呢件記住快手快腳，輸贏都要落車，遲吓溢價會好快冇晒。
禾雀亂飛，乜股票都有人炒。中策（235）是日喺成交少少之下升咗11%，帶動隻公司輪1216由1仙飛上2.7仙，升170%排喺榜首。呢件玩到今年12月尾，溢價12倍並非好貴，但6.2倍槓桿就唔算吸引。正股同輪都係冷門貨色，要博，市場上重有其他選擇。
章盛