有人禮貌周周、豪氣闊綽；有人隨地吐痰、欺善怕惡。大批內地「自由行」遊客湧到香港，令港人有更多機會與這批「香港經濟救星」作近距離接觸，旅遊、飲食及零售業等前線服務業從業員，每天與各式各樣的內地來客「交手過招」，一幕幕難忘的情景，填補了他們腦中對內地人的刻板印象。
面對這班質素參差的貴客，前線人員可謂又愛又恨，但也得慢慢學習和接受，如何與他們融洽相處。
有學者認為，自由行推行不足一個月，不應匆匆評斷內地遊客的質素，而且各地人民都是質素參差，不能因此而批評內地遊客的質素較差。 記者：林社炳、謝明明、蔡元貴
「內地客普遍非常追求潮流，着重啲衫嘅款式同產地來源，反而不會太在意價錢。」但似乎這批貴客相當依賴售貨員作為他們的潮流領航員：「佢哋會主動問我哋（售貨員）𠵱家時興邊啲款式同顏色，甚至點樣配搭。」
Sara又說：「佢哋普遍都幾有禮貌，同一般外國遊客一樣，並冇話較難服侍，但相對日本客嚟講，內地客始終冇咁斯文，有啲重會好大聲咁講嘢，影響店內環境。」近年內地遊客及台灣遊客的消費力較一般顧客為高，以該店為例，中、台兩地遊客的消費佔該店營業額三成，而且比例有上升趨勢，將本地及日本客比了下來。
「愈有錢嘅內地客，佢哋就愈容易相處同有禮貌，相反冇咁有錢個班客就會比較挑剔。」近日與內地客接觸多了，任侍應的鄺耀雄得出這個結論。他尤其喜愛闊綽的北方客，但也碰過難服侍的客人。
「試過有班內地客諸多要求，大聲叫我倒茶嘅時候，個茶壺嘅嘴唔可以掂到隻杯，又呢樣又個樣，直情將內地個套搬落嚟香港，如果喺繁忙時間嘅話，咁都幾煩，重會阻礙我做嘢！」
但他說，普遍內地客的表現都較其個人印象文明有禮，與一般顧客無異，但他希望內地遊客可以待人有禮的態度對待服務人員，「千祈唔好將內地個套呼喝文化搬落嚟香港，咁就唔係咁好。」
經常在北角街頭清潔垃圾的大嬸，對於近來多了內地遊客來港，說來有點氣憤。
原來大嬸有一次清理垃圾桶時，遇上講普通話的內地遊客胡亂吐痰：「佢對住個垃圾桶，係咁放完一次飛劍又一次。最弊係佢吐唔正，更加冇用紙包住啲痰。」
內地客一副肆無忌憚的樣子，但大嬸對他怒目而視，告訴他在香港隨地吐痰乃違法行為。
「佢重惡形惡相，以為走埋去垃圾桶吐痰就冇錯。我話佢知，喺香港亂咁吐痰，要罰一千五百蚊。」原本理直氣壯的內地客，立即嚇得向大嬸道歉，她總算見識到內地客欺善怕惡的作風。
同區巡邏專捉垃圾蟲的食物環境衞生署人員透露，曾有內地遊客做垃圾蟲被捉，「罰單照發，但係繳交罰款嘅日期有成二十一日，而內地遊客嚟玩最多都係七日，有的重係三四日。罰佢錢，佢哋都一於好少理，唔交罰款就走人，離開香港。」
澳洲大學畢業返港、在海洋公園做暑期工的Carrie，自言很喜歡小朋友，覺得內地小朋友與本地小朋友同樣可愛。但不知是否受內地「一孩政策」影響，Carrie總覺得內地小孩比較「難教」：「香港小朋友比較聽話，內地小朋友比較巴辣，要嘥口水同佢哋講解遊戲規則。講完之後，佢哋好似聽唔到。」
Carrie略帶微言，「小朋友唔明唔緊要，有部份帶仔女嚟玩嘅內地家長，以為畀二百蚊入場費，就乜都玩得。經常要費盡唇舌，解釋部份遊戲有高度同年齡限制，太大個唔玩得，太細個亦唔玩得。」
她的同事阿Kit則說：「𠵱家嘅內地客衣着靚咗好多，而且多咗自己嚟玩，特別多咗一家大細合家歡嘅內地遊客。兒童遊樂區唔准吸煙，要經常同抽煙嘅家長解釋規定。」
「佢哋（內地遊客）專揀至頂級嘅牌子，唔貴都唔會買，尤其係北方嗰班客，動輒用十幾廿萬現金買表都面不改容。有啲內地客更會用超級市場膠袋裝住啲錢嚟買手表，試過有個客用三百幾萬去買隻伯爵鑽石表，另一次有個客就用百幾萬現金買咗兩隻伯爵表，足足用幾袋銀紙去裝，豪爽程度比好多本地客厲害。」銅鑼灣德信表行營業主任黃少偉說。
不過，內地客並沒有想像中般「財大氣粗」，黃少偉說：「佢哋普遍都好易服侍。」
他稱，內地遊客的消費能力強，已逐漸取代本地客的地位，雖然內地遊客近年開始懂得講價和「格價」，但他們始終出手較其他顧客疏爽闊綽，他預期除非內地大幅調低入口關稅，降低入口貨價格，否則內地人仍會喜歡來港購買名牌貨品。
