瑜伽高手黃佩霞前晚偕同拍拖一年的外籍男友Bryan出席寶馬晚宴，兩人均是熱愛運動之人，年前參加越野賽時認識，兩人更已見過雙方家長，但經過一次婚姻失敗後，黃佩霞表示並無結婚計劃，一切隨緣發展。
寶馬為慶祝推出最新五系530iA房車，新車售價約六十三萬九千港元，前晚假灣仔會展舉行晚宴，出席者包括王敏德、馬詩慧夫婦，黃佩霞及男友等。
黃佩霞前晚大方介紹拍拖一年的外籍男友Bryan給傳媒認識，兩人因運動而結緣，她說：「我哋都係熱愛運動嘅人，幾年前參加越野賽時識嘅，佢係做外展訓練嘅。我哋平時嘅活動都離唔開運動，好似踩單車同滑水，我重有教佢做瑜伽㖭。本來我哋計劃早前復活節出外參加X-game，但後來因為沙士取消咗。」問她有沒有與Bryan結婚的打算？她說：「我都試過一次婚姻失敗，𠵱家咁咪幾好，都係隨緣啦。」
除了教授瑜伽闖出新天地外，黃佩霞近期事業發展亦相當不俗，她早前以模特兒身份拍攝了一輯月曆照片，她說；「我係代表香港嘅，MaggieQ就代表夏威夷，影呢輯相條件好好，除咗酬勞之外，如果賣得好重會有得分紅㖭。」
另外，王敏德、馬詩慧夫婦也是晚宴座上客，早前有報道指兩人十一歲的大女正在蜜運中，馬詩慧前晚說：「唔算拍拖，係個男仔約吓佢去街啫，不過次次我都在場，個女都係拖住我隻手啫。」
採訪：JessicaNgan
攝影：ChanChiLam
