基金L最近放長假，唔知幾時先至返工，於是引起老友關注，以為佢要「起身」，長期放假，返屋企睇黎文卓三字經《左一句，右一句》㖭。呢本書雖然好睇，都唔使睇好耐嘅啫。
呢日搵到基金L去食飯，問佢究竟實情如何，基金L話：「其實我積埋唔少假期，公司好想我清咗佢，此其一；我在股票投資打滾多年，托賴尚算有運氣，唔會輸畀大市，對得住基金投資者，並無提早退休打算，此其二；但係近幾年有咗互聯網之後，資訊爆炸，實在多到睇唔晒，我都吸收到有啲消化不良，事實上，多資訊並非一定係好事，對投資決策冇作用。我心思思放一個悠長假期，起碼三個月，離開市場，等我嘅腦袋可以清靜吓、消化吓，企高啲，再睇番落地面，第日重返市場，當有一番不同體會。」
呢番說法，都係第一次聽見，基金L能夠放假起碼三個月，令人羨慕。呢三個月做乜嘢呀，會唔會去進修（如柯老大），吸收財務分析、經濟學，重新叉電？基金L話：「非也，非也，我要學一啲完全唔識嘅，令我冇時間再諗財務分析、公司年報、經濟增長嘅事，如果唔係，點樣潔淨腦袋？」基金L選咗學一門外語，就係香港人唔多識嘅德文。德文係一種比較科學化，結構嚴謹嘅語言，唔易學，基金L讀一個密集課程，專心學習，肯定冇時間追蹤大市動向，佢有此中環人比較少有嘅新鮮意念，值得尊敬！