一向以改裝平治汽車而聞名嘅AMG，多年來都有為平治旗下車系推出強化改裝版，當中至頂級S-Class豪華轎車及CL轎跑車亦唔例外，有關方面更特別推出全新S65AMG高性能豪華房車，同埋CL65AMG高性能轎跑車。
全新S65AMG及CL65AMG車身加有全車包圍、巨型跑車合金胎軨之餘，車尾更加有左右雙出式電鍍尾喉，以及V12Biturbo徽章，令造型望落更見有高性能跑車韻味。至於車廂方面，兩者皆裝有由高級真皮鑲嵌而成嘅跑車座椅，乘坐倍覺貼服舒適，就連車速計嘅刻度，亦提升至360km/h咁多呢！
不過相信最吸引嘅，會係配用於佢哋身上嘅一台全新6.0公升V12Biturbo偈，除馬力輸出高達612匹外，就連扭力輸出亦高達102.0kgm/2000-4000rpm，匹配5前速AMGSpeedshift半自動波箱，難怪新車0至100公里加速度僅為4.4秒，而極速亦可高達250km/h咁快啦！