唔知係咪新世界何太同信和韓家輝，最近翻睇周星馳主演嘅西遊記，睇到月光寶盒神奇力量，從中得到靈感，即刻喺美國訂咗個密碼盒番嚟，擺喺何文田君頤峰示範單位參觀接待處，並命名為「君頤寶盒」。
個盒有乜用？原來係用嚟玩遊戲。何太好有心機咁講，個寶盒一早設定六個數字密碼，凡參觀君頤峰嘅人士，每人可㩒一次。如果㩒中密碼，咁就不得了啦！因為可得到價值二十五萬嘅卡地亞鑽石頸鏈。個盒只擺放一個月，要㩒趁早啦。蘭西相信，呢個月一定有唔少女士參觀君頤峰，而且部份重會日日見、上下晝都見㖭噃。
另外，鍾意周圍睇樓嘅新地郭氏兄弟，細佬郭炳聯噚日就同下屬黃奕鑑、周國賢同雷霆去參觀畢架山一號示範單位，再馬不停蹄走入屯門睇海典軒。
發展商同樓盤改名，若改得好，令人印象深刻，賣都容易啲。聽聞，通曉多國語言，重有「澳門李嘉誠」之稱嘅九龍建業主席柯為湘，就親自為旗下堅尼地城北街采逸軒改咗個法文名MansionduNord，意思解作向北嘅樓。
母公司保利達集團喺澳門黑沙灣嘅海名居，同樣用法文名，叫做LaBaieduNoble，係指貴族住嘅海灣。
香港夜景迷人、青馬大橋雄偉壯觀，兩個都係遊客拍照留念嘅熱門景點。九龍倉為配合「自由行」南下的大量訪港旅客，喺旗下兩個樓盤，尖沙嘴擎天半島同深井碧堤半島，設咗個留影區，畀參觀示範單位嘅旅客影相。
九倉特意喺擎天半島一千八百方呎示範單位大廳嘅窗上，貼咗一幅維港夜景海報，前面放兩張櫈，畀旅客坐喺度影相，九龍倉助理董事黃光耀，同中原董事劉瑛琳，率先示範，效果同真嘅都差唔多。至於碧堤半島就用青馬大橋做背景。
假如遊客去唔切香港嘅景點，或者係時間唔夾，喺度影番張相，都可以當做還個心願。
世紀21鑽石山分行經理密雪英講，黃大仙區係「租霸」橫行嘅地區，不過，旗下代理黃仲儀就表現出色，個人包辦嗰區一半嘅租務成交。
佢透露，最近有個鑽石山龍蟠苑業主，因年老母親每日會去慈雲山望彌撒，所以決定喺慈雲山租個單位，同埋將手上單位放租，呢名業主指定全部要由黃仲儀負責，最後佢梗係能完成使命啦，一次做成兩單租務。
電郵地址：