鄭中基首次擔正的新戲《龍咁威2003》前日開畫票房勁收一百零四萬，成績甚佳。而緋聞男女李燦森和Stephy前晚一起出席《龍》片免費場時，被問到是否拍拖，李燦森曖昧地說：「可以話係，可以話唔係」。
鄭中基擔正的《龍咁威2003》，前日首日票房大收一百零四萬，更勝同日上映在美國勁收二億票房的《魔盜王——決戰鬼盜船》的八十多萬，而同期成龍主演的《飛龍再生》上周五開畫日亦只收七十六萬四千。前晚電影公司在銅鑼灣總統戲院安排了一場免費場，眾演員都有出席。
李燦森（阿Sam）與Stephy因合作《龍》片傳緋聞，前晚Stephy起初拒絕與阿Sam合照，但阿Sam則說：「我哋好大方，影呀。」但阿Sam拒絕搭Stephy膊頭，反而Stephy說：「等我嚟。」然後一手搭着阿Sam肩膊合照。問阿Sam與Stephy是否拍拖，他說：「可以話係，可以話唔係，其實我哋冇嘢，Stephy係好女仔，但𠵱家未到嗰個階段。」
而主角鄭中基昨日在電話中談到票房甚佳時，雀躍地說：「噚晚我問導演谷德昭呢個數字好唔好，佢話講你都唔明，總之OK啦。我第一次做主角，本來諗住有五六十萬都好開心。」Ronald謂他稍後會買禮物送予該戲的合作夥伴。
此外，楊千嬅昨日於銅鑼灣，宣傳「保良局兒童助養計劃」時，對於《龍》片票房首日收過百萬票房，有份客串的千嬅即說：「嘩！咁勁？」。千嬅緋聞男友鄭中基表示會送禮物給客串演員，問到千嬅想收甚麼禮物？千嬅說：「啲錢用嚟助養晒保良局啲小朋友就最好。」
採訪：魯萍、蔡如玉
攝影：何國豪
