大市旺成咁，連多隻藍燈籠都大幅炒上，實在令唔少上市公司心動，認為係時候出嚟搞下活動抽吓水。
好似向來炒味較濃嘅金威集團（910），隔冇耐就會炒一轉，家陣個市咁旺，又點會冇佢份？聽聞金威將與分析員會面，搞吓吹水活動。近排成交增加，似有開車迹象。金威噚日上升2.6%，收0.395元，成交金額高達1093萬元。
市場傳聞金威或有配股活動，但照計冇咁快進行，皆因公司截至今年6月全年業績，大約會在下月公布，所以就算要配股都要等吓，但據講有班人打算在呢段時間內先炒一轉。
金威老闆幾個月前曾經增持股份，跟住公司在6月喺0.27元左右回購，之後隻股造好，由0.355元升至噚日0.395元，升幅話多唔算多，話少亦唔算少。
經紀陳話，基於個市近排炒風咁盛，跟風投機炒番轉亦無妨，但最緊要係識得轉身，有乜𠵱郁即刻落車。
慕容小初