蕭正楠日前在一木廠內拍新歌MV，入行只一年的他傳過不少負面新聞，他表示娛樂圈是第一份工作，面對負面新聞感無所適從及不開心，其後填詞人林夕了解蕭正楠這一年的心路歷程後，為他寫了一首《你想我點》，讓他唱出自己的感覺。
蕭正楠（Edwin）出道至今一向給人印象是陽光大男孩，最近他有意改形象，蓄起鬍子，希望增添男人味之餘，亦想給fans帶來新鮮感。唱片公司為配合Edwin的新形象，早前在木廠內拍攝他的新歌MV及唱片封套，當日Edwin以「木工look」示人，在三十八度高溫下，二十多名工作人員一同困在冷氣欠奉的室內拍攝，Edwin汗流浹背，果真充滿「男人味」。
新歌《你想我點》由林夕填詞，原本林夕打算寫一隻情歌，其後了解了Edwin出道一年的心路歷程後，即時把歌詞改掉。Edwin承認入行後，確實令他感到無所適從，他說：「呢首歌嘅歌詞令我好有共鳴，我讀完書第一份工就係做歌星，可能人生閱歷淺，所以有無所適從嘅感覺，呢一年嚟，緋聞傳過，不和又傳過，但其實呢啲並唔係我想見到嘅嘢。」
Edwin續說：「我其實一直想喺圈中搵到交心嘅朋友，𠵱家唔係冇，只係少啲，有時自己都會落咗道閘先，如果表現得同人友好啲，又會俾人話黐，如果唔出聲，又會俾人話自閉，所以曾經唔係咁開心。好在唱片公司同朋友開解之後，我都識調節，我自己亦唔想再行靚仔路線，希望有性格啲，同埋變得成熟啲。」
