大市調整兩日（恒指僅回落49點，市底真係好強），又再上過，且大升168點，高收10643，期指升勢更急，高水30點，大市成交近140億元，有動力支持，仍可看好。
上升股（不計認股證）超過450隻，最突出係私有化嘅合縱連網（8107），升咗75%，一路數落去，就算排到50大的，升幅都逾10%。大市炒風轉烈，主要係有唔少股票過往實在跌得太殘，𠵱家經濟有轉機，呢一類有盈利前景支持，而股價重係大幅折讓嘅股份，就會成為被追捧嘅對象，即使股價升咗唔少，但重係好吸引。
遠東發展（035）就係最佳例子，上月底，股價重徘徊在0.3元水平，噚日已升上0.72元，短短大半個月，上升140%，不過，到咗呢個位，仍然係好抵買，未來股價重有好大上升空間。
里昂新鮮熱辣（噚日出街）同遠展出咗份報告，話佢係股市中一個「大翻身」嘅傳奇。報告指遠展經歷多年低潮，03年度（3月年結）仍虧蝕1.32億元，但預料04年度已可轉盈，重有利潤1.68億元，05年度重犀利，盈利會大升170%至4.59億元，06年度仍可保持此高水平。
中國推出自由行，令經歷非典低潮的本港酒店業，一天光晒。遠展手上有兩家3星級酒店，另在建中有3家，分別位於灣仔、中環和大角嘴，將陸續在未來1年落成。自由行每個禮拜有幾萬人來港，遠展可謂食正條水。
集團在上海發展地產，經多年耕耘，盈利開始進入高增長期，主力項目係上海錦秋加州花園，總發展樓面面積1000萬平方呎，已售出360萬平方呎，由於項目的基建（包括公路、渠務和會所等）已完成，因此現時售樓利潤高達50%，估計未來兩三年可提供7至8億元盈利，重大過遠展嘅市值。
講番今個年度，遠展每股盈利17仙，預測PE只係4.2倍；下個年度，每股盈利大增到47仙，PE僅1.5倍。遠展盈利主要來自酒店經營、地產發展和租金，以仍屬保守的5倍PE計，股價明年已可見2.35元，比現時升兩倍。重有，報告計過遠展資產淨值30.5億元，每股3.1元，現時股價大幅折讓73%！
郭兆誠