我羅拉同啲口痕友傾開，日本女星入面唔化妝都見得人嘅，廣末涼子都數一數二啦！或者咁講，廣末比起其他藝人嚟講，好似唔係好介意人哋知道佢私底下嘅一面，佢俾人影過無數次被指「發癲」嘅相就不在話下啦，而佢經常參與鄉下團體嘅公開活動，一樣任影唔嬲，一副「最緊要係我enjoy」嘅態度。
好似上個禮拜一，廣末又返咗佢鄉下愛知縣，參加當地最大的祭典遊行「YOSAKOI祭」，佢穿起所屬隊伍嘅祭典制服，手持叫「鳴子」嘅樂器，由大街跳到小街，跳足一日流到身水身汗，但都無嗌過辛苦，而且重全日笑容滿面！似乎廣末當日玩得好盡興，就算攰起上嚟都只係喺街邊坐下，絕無擺出明星款。其實廣末又唔係從來冇俾人話過大牌，可能佢返到屋企，個人當堂冇晒壓力啩！
當然有啲外來觀光客見到佢，都會大嗌：「廣末呀！真人好Kawaii呀！」但其實當地街坊已經見怪不怪，因為念舊嘅廣末，細細個開始已經有玩呢個祭典跳舞隊，祭典隊班人當然都覺得廣末好有心，一有時間就返去幫手，好似前年事業低潮時，佢都有返去㗎！